Toshkentdagi yana bir ko‘cha 5 oyga yopiladi

Toshkent shahrining Olmazor tumanidagi Qorasaroy ko‘chasida transport vositalari harakati 5 oyga to‘xtatiladi. Bu haqda shahar hokimligi ma’lum qildi.

Bildirilishicha, qurilish-ta’mirlash ishlari olib borilishi munosabati bilan Olmazor tumanidagi Qorasaroy ko‘chasida transport vositalari harakati vaqtincha to‘xtatiladi.

Yopiladigan qism Abdulla Qodiriy ko‘chasi bilan kesishgan joydan Nurafshon ko‘chasi bilan kesishgan joygacha bo‘ladi.

Ishlarni bajarish muddati esa ertaga, 2 apreldan sentyabr oyigacha davom etadi.

“Vaqtinchalik noqulayliklar uchun uzr so‘raymiz va haydovchilarga muqobil yo‘nalishlardan foydalanib, o‘z yo‘llarini oldindan rejalashtirish tavsiya etiladi”, deyiladi xabarda.

Eslatib o‘tamiz, oldinroq Shayxontohur tumanining Shofayzi ko‘chasi 21 martdan 1 mayga qadar,  “O‘zbekiston ovozi” ko‘chasining Shastri ko‘chasi bilan chorrahadan Yahyo G‘ulomov ko‘chasigacha bo‘lgan hudud 27 martdan 30 aprelga qadar avtotransport harakati uchun yopilgandi.