Тошкентдаги яна бир кўча 5 ойга ёпилади

Тошкент шаҳрининг Олмазор туманидаги Қорасарой кўчасида транспорт воситалари ҳаракати 5 ойга тўхтатилади. Бу ҳақда шаҳар ҳокимлиги маълум қилди.

Билдирилишича, қурилиш-таъмирлаш ишлари олиб борилиши муносабати билан Олмазор туманидаги Қорасарой кўчасида транспорт воситалари ҳаракати вақтинча тўхтатилади.

Ёпиладиган қисм Абдулла Қодирий кўчаси билан кесишган жойдан Нурафшон кўчаси билан кесишган жойгача бўлади.

Ишларни бажариш муддати эса эртага, 2 апрелдан сентябрь ойигача давом этади.

“Вақтинчалик ноқулайликлар учун узр сўраймиз ва ҳайдовчиларга муқобил йўналишлардан фойдаланиб, ўз йўлларини олдиндан режалаштириш тавсия этилади”, дейилади хабарда.

Эслатиб ўтамиз, олдинроқ Шайхонтоҳур туманининг Шофайзи кўчаси 21 мартдан 1 майга қадар,  “Ўзбекистон овози” кўчасининг Шастри кўчаси билан чорраҳадан Яҳё Ғуломов кўчасигача бўлган ҳудуд 27 мартдан 30 апрелга қадар автотранспорт ҳаракати учун ёпилганди.