Toshkentda “zapravka” 11,4 mlrd so‘mlik gazni o‘g‘irladi

Toshkent viloyati Bekobod shahrida 11,4 mlrd so‘mlik tabiiy gazni talon-toroj qilgan gaz to‘ldirish shoxobchasi aniqlandi. Bu haqda Bosh prokuratura xabar berdi. 

Qayd etilishicha, yoqilg‘i-energiya resurslaridan noqonuniy foydalanish holatlarini fosh etishga qaratilgan tadbirda Toshkent viloyati Bekobod shahridagi “G‘.O.” MCHJ mansabdor shaxslari jamiyatga qarashli avtomobillarga gaz to‘ldirish kompresslash shoxobchasining o‘lchov qurilmalariga tashqi ta’sir ko‘rsatishi oqibatida 11,4 mlrd so‘mlik tabiiy gazni talon-toroj qilgani aniqlangan.

Bildirilishicha, mazkur holat yuzasidan jamiyat mansabdor shaxslariga nisbatan Jinoyat kodeksining 169-moddasi (O‘g‘rilik) 4-qismi “a” bandi bilan jinoyat ishi qo‘zg‘atilgan.

Eslatib o‘tamiz, avvalroq Qoraqalpog‘iston Respublikasida jami 1,1 million kub metr tabiiy gazdan qonunga xilof ravishda foydalanib, davlat va jamiyat manfaatlariga 2,8 milliard so‘m zarar yetkazgan gaz to‘ldirish shoxobchasi aniqlangandi.