Toshkentda Tohir Sodiqovning konsertidan so‘ng fuqarolar janjallashgani aytilmoqda

Ijtimoiy tarmoqlarda “Bolalar” guruhi yakkaxoni, O‘zbekistonda xizmat ko‘rsatgan artist Tohir Sodiqovning konsertidan so‘ng voyaga yetmagan qizga tegajog‘lik bo‘lgani ortidan janjal chiqqani aks etgan video xabarlar tarqaldi. Holatga Toshkent shahar bosh boshqarmasi Matbuot xizmati munosabat bildirdi.

Qayd etilishicha, voqea kecha, 1 iyun kuni taxminan soat 22:45 larda Chilonzor tumanida o‘tkazilgan konsertlarning birida sodir bo‘lgan. 2003 va 2004 yilda tug‘ilgan bir nechta fuqarolar konsert dastur yakunlangandan so‘ng og‘zaki tortishib qolgani uchun tomonlar o‘zaro janjallashib ketgan.

Mazkur holat yuzasidan ushbu fuqarolarga nisbatan Ma’muriy javobgarlik to‘g‘risidagi kodeksning 183-moddasi (mayda bezorilik) va 194-moddasi (Ichki ishlar organlari xodimining qonuniy talablarini bajarmaslik) alomatlari bilan ma’muriy bayonnomalar rasmiylashtirilib, qonuniy chora ko‘rish uchun Jinoyat ishlari bo‘yicha Chilonzor tuman sudiga yuborilgan.