Toshkentda Spark va Malibu to‘qnashuvi oqibatida bir kishi vafot etdi

Toshkent shahri Chilonzor tumanida Malibu va Spark ishtirokida yuz bergan yo‘l-transport hodisasida bir nafar shaxs vafot etdi. Bu haqda IIBB Yo‘l harakati xavfsizligi boshqarmasi ma’lum qildi.

Bugun, 26 yanvar kuni soat 02:20 larda Chilonzor tumani Bunyodkor ko‘chasi Chilonzor buyum bozori qarshisida 2004 yilda tug‘ilgan A.T. boshqaruvidagi Malibu 2 va 1997 yilda tug‘ilgan B.B.ga tegishli Spark avtomashinasi ishtirokida yo‘l-transport hodisasi sodir bo‘lgan.

Mazkur YTH oqibatida Spark rusumli avtomashinasi haydovchisi voqea joyida vafot etgan. Shuningdek, Spark avtomashinasining 1 nafar yo‘lovchisi tan jarohat olib shifoxonaga yotqizilgan.

Ushbu holat yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi 2-qismi bilan jinoyat ishi qo‘zg‘atilgan. Tergov davom etmoqda.

“Barcha yo‘l harakati qatnashchilaridan qoidalarga rioya qilishlarini so‘raymiz”, deyiladi xabarda.