Koronavirus sabab O‘zbekistonda taqiqlar qo‘yilishi kerakmi?

north_east

Koronavirus qurbonlari soni 200 dan oshdi. JSST xalqaro favqulodda vaziyat e’lon qildi

Avvalroq, Kamboja, Gongkong, Makao, Tayvan, Tailand, Yaponiya, Janubiy Koreya, AQSH, Vetnam, Singapur, Nepal, Fransiya, Germaniya, Avstraliya, Malayziya va BAAda koronavirus bilan kasallanish holatlari qayd qilingani haqida xabar bergan edik.

Ijtimoiy tarmoqlarda mazkur holat yuzasidan O‘zbekistonda hech qanday taqiqlar qo‘yilmayotgani yuzasidan muhokamalar avj olmoqda. Epidemiya tarqalishining oldini olish uchun Qozog‘iston, Qirg‘iziston, Rossiya, Mo‘g‘uliston va Malayziya Xitoy bilan chegarasini yopdi. Yana qator davlatlar Xitoy fuqarolariga nisbatan viza cheklovlarini joriy etdi. O‘zbekiston bunday vaziyatda qanday yo‘l tutadi? O‘zbekiston ham chegaralarni yopishi kerakmi? Sog‘liqni saqlash vaziri Alisher Shadmanov mazkur savolga javob berdi:

– Mazkur koronavirusga qarshi kurash doirasida biz nafaqat Xitoydan keluvchilar, balki barcha yo‘nalishlardan davlatimiz hududiga kirib keluvchi yo‘lovchilarni qat’iy nazoratdan o‘tkazayapmiz. Chegara punktlari teplovizorlar bilan jihozlangan, virus tashishi mumkin bo‘lgan mahsulotlar jiddiy tekshiruvdan o‘tkaziladi. Aynan virus tarqalgani qayd etilgan hududlardan tashrif buyuruvchilar va kasallikning har qanday belgisi kuzatilgan fuqarolar alohida nazoratga olinadi. Yuqumli kasalliklar shifoxonalarida hududga ko‘ra alohida o‘rinlarni shay holda tayyorlab qo‘yganmiz, zarur dori-darmon zaxiralari yaratilgan.

Endi chegarani yopish masalasiga kelsak, bu chorani qo‘llash vazirligimiz vakolatida emas. Ammo bu borada o‘z fikrimni aytadigan bo‘lsam, ayni paytda, ya’ni 30 yanvar holatida mamlakatimiz hududida bunday kasallikka chalinish holati birorta ham kuzatilmaganligiga qaramasdan ehtiyot choralarini ko‘rishimiz lozim. Shaxsan o‘zim yurtimiz fuqarolarining Xitoyga borishini cheklash bilan bir qatorda, xitoyliklar va boshqa xorijiy davlatlar fuqarolarining ushbu mamlakatdan yurtimizga kirib kelishini vaqtinchalik cheklash tarafdoriman. Chunki, ushbu virusning havo-tomchi yo‘li bilan o‘tishi, odamdan odamga yuqishi, bundan tashqari, kasallik belgilarining yashirin davri 14 kun davom etishi kasallik tarqalish xavfini keskin oshiradi.

Qolaversa, hatto tibbiyoti rivojlangan AQSH, qator Yevropa davlatlari, Osiyoning taraqqiy etgan mamlakatlarida ham bu kasallik kuzatilayotganligi vaziyatning naqadar jiddiyligini ko‘rsatib turibdi, degan Alisher Shadmanov.

Ma’lumot uchun, pnevmoniyani keltirib chiqaradigan koronavirusning 2019-nCoV yangi turi 2019 yil dekabr oyida Xitoyning Xubei provinsiyasida, Uxan shahrida vujuga keldi. Hozirgi vaqtda XXRda yangi koronavirus bilan kasallanganlar soni 7700 kishidan oshdi, ulardan 170 nafari vafot etdi.