Toshkentda ko‘chaga chiqindi tashlaganlarga 1 kun ichida 11 mln so‘m jarima solindi 

3-sahifa

image

Toshkent shahrida bir kunning o‘zida chiqindi tashlash bilan bog‘liq 16 ta huquqbuzarlik aniqlandi. Bu haqda Toshkent shahar Ekologiya, atrof-muhitni muhofaza qilish va iqlim o‘zgarishi boshqarmasi xabar berdi.

Qayd etilishicha, boshqarma tomonidan belgilanmagan joylarga chiqindi tashlashga qarshi navbatdagi reyd tadbirlari o‘tkazilgan. Xususan, 12 mart kuni o‘tkazilgan reyd davomida poytaxt hududida bir kunning o‘zida chiqindi tashlash bilan bog‘liq 16 ta huquqbuzarlik aniqlangan.

Huquqbuzarlarga Ma’muriy javobgarlik to‘g‘risidagi kodeksning 91-1-moddasi 1-qismi bilan ma’muriy bayonnoma rasmiylashtirilgan va jami 11 million 375 ming so‘m jarima qo‘llanilgan.

Ma’lumot uchun, Ma’muriy javobgarlik to‘g‘risidagi kodeksning 91-1-moddasi 1-qismiga ko‘ra, belgilanmagan joylarga qattiq maishiy chiqindilarni va qurilish chiqindilarini tashlash, shuningdek, suyuq maishiy chiqindilarni to‘kish fuqarolarga bazaviy hisoblash miqdorining 1 baravaridan 3 baravarigacha (375 000 — 1 125 000 so‘m), mansabdor shaxslarga esa 10 baravaridan 20 baravarigacha (3 750 000 — 7 500 000 so‘m) miqdorda jarima solishga sabab bo‘ladi.

Xuddi shunday huquqbuzarlik ma’muriy jazo chorasi qo‘llanilganidan keyin bir yil davomida takror sodir etilsa, fuqarolarga bazaviy hisoblash miqdorining 5 baravaridan 10 baravarigacha (1 875 000 — 3 500 000 so‘m), mansabdor shaxslarga esa 20 baravaridan 30 baravarigacha (7 500 000 — 11 250 000 so‘m) miqdorda jarima solinadi.

Eslatib o‘tamiz, avvalroq Toshkentda belgilanmagan joylarga chiqindi tashlayotgan qoidabuzarlarga qarshi keng ko‘lamli reydlar o‘tkazilayotgani haqida xabar berilgandi.


Maqola muallifi

Teglar

chiqindi

Baholaganlar

0

Reyting

3

Maqolaga baho bering

Doʻstlaringiz bilan ulashing