Toshkentda 3 ta mashina ishtirokida YTH sodir bo‘ldi (video)

Bugun, 6 noyabr kuni Toshkent shahri Yashnobod tumanida 3 ta mashina ishtirokida yo‘l transport hodisasi sodir bo‘ldi. Bu haqda shahar IIBB axborot xizmati boshlig‘i Nilufar Isoxonova QALAMPIR.UZ ga ma’lum qildi.

Unga ko‘ra, bugun, soat 14:00 larda Yashnobod tumani Pahlavon Mahmud ko‘chasi 23-uy qarshisida 45 yoshli A.P. boshqaruvida bo‘lgan KIA Seltos, 23 yoshli M.M. boshqaruvidagi Gentra va 39 yoshli N.T. boshqaruvidagi Cobalt rusumli avtomashinalari ishtirokida yo‘l transport hodisasi sodir bo‘lgan.

Oqibatda KIA Seltos rusumli avtomashina ag‘darilib ketgan va haydovchisi turli darajadagi tan jarohatlari bilan shifoxonaga olib ketilgan. 

“Holat yuzasidan Toshkent shahar IIBB YHXB mas’ul xodimlari tomonidan surishtiruv harakatlari olib borilmoqda”, deydi Nilufar Isoxonova. 

Eslatib o‘tamiz, joriy yilning 21 oktyabr kuni Toshkent viloyati O‘rta Chirchiq tumanida 6 ta mashina ishtirokida yo‘l-transport hodisasi sodir bo‘lgan edi. Shuningdek, 18 oktyabr kuni Surxondaryo viloyatidagi temiryo‘l kesishmasida teplovoz Spark rusumli avtomobil bilan to‘qnashib ketgani haqida xabar berilgan edi.