Toshkent shahar IIBB “Baxti Tashkentskiy” bo‘yicha murojaat bilan chiqdi
3-sahifa
−
04 dekabr 2023
74447Toshkent shahar Ichki ishlar bosh boshqarmasi fuqarolarga murojaat bilan chiqib, tezkor tadbirlar davomida qo‘lga olingan Baxtiyor Zafarovich Qudratullayev (“Baxti Tashkentskiy”), Dilshod Tulkinovich Sharipov va Anvar Babarajabovich Mirzaxanovning jinoiy xatti-harakatlari bo‘yicha ma’lumotlarga ega bo‘lganlardan poytaxt IIBBga murojaat qilishlarini so‘radi.
“Hurmatli fuqarolar agar Siz ushbu shaxslardan yoki guruh a’zolaridan jabr ko‘rgan bo‘lsangiz yoki ushbu shaxslarning jinoiy xatti-harakatlari bo‘yicha ma’lumotlarga ega bo‘lsangiz, Toshkent shahar IIBBning 71-206-45-69, 71-206-49-46 yoki 102 raqamlariga yoxud 99-370-73-94 telegram raqamiga murojaat qilishingizni so‘raymiz”, deyiladi xabarda.
Qayd etilishicha, murojaatchining shaxsi sir saqlanishi kafolatlanadi.
Eslatib o‘tamiz, kecha, 3 dekabr kuni Toshkent shahar IIBB Tergov boshqarmasi tomonidan Jinoyat kodeksining 165-moddasi 3-qismi (juda ko‘p miqdorda tovlamachilik) bilan qo‘zg‘atilgan jinoyat ishi tergov qilinayotgani, mazkur jinoyat ishi doirasida o‘tkazilgan tergov-tezkor harakatlari davomida jinoiy faoliyat olib borgan bir nechta shaxslar gumonlanib ushlanganini ma’lum qilgandi.
Jumladan:
• 1971 yilda tug‘ilgan Baxtiyor Zafarovich Qudratullayev (165-modda 3-qismi, juda ko‘p miqdorda tovlamachilik; 276-modda 2-qismi, ko‘p miqdorda giyohvandlik vositalarini saqlash);
• 1980 yilda tug‘ilgan Dilshod Tulkinovich Sharipov (165-modda 3-qismi, juda ko‘p miqdorda tovlamachilik);
• 1972 yilda tug‘ilgan Anvar Babarajabovich Mirzaxanov (165-modda 3-qismi, juda ko‘p miqdorda tovlamachilik) qo‘lga olingan.
“Ushbu shaxslar tahdid va kuch ishlatish yo‘li bilan pul mablag‘larini qonunga hilof ravishda qo‘lga kiritish bilan shug‘ullangan”, deyilgan IIBB xabarida.