Toshkent metrosining 2 bekatida ish tartibi o‘zgardi

Toshkent metrosining “Texnopark” (Do‘stlik-2) va “Yashnobod” (2-bekat) bekatlari ish tartibi vaqtincha o‘zgardi. Bu haqda metropoliten matbuot xizmati xabar berdi. 

Unga ko‘ra, ertaga, 25 noyabrdan boshlab “Texnopark” va “Yashnobod” bekatlari ish rejimi soat 06:00 dan 22:00 ga qadar tashkil etiladi. 

Aniqlik kiritilishicha, Yerusti halqa yo‘lining II bosqichidagi Quruvchilar dahasidan Sergeli mavzesigacha bo‘lgan “Turon” (13-bekat) va “Qipchoq” (14-bekat) metro bekatlarini ishga tushirish maqsadida yo‘nalishdagi boshqa mavjud bekatlar bilan texnik jihatdan o‘zaro bog‘lash ishlari tufayli ushbu bekatlarning ish tartibi o‘zgartirilmoqda.

Shuningdek, “Tuzel” (3-bekatidan) “Quruvchilar” (12-bekat) bekatigacha bo‘lgan bekatlar oralig‘ida ish rejimi o‘zgarmagan holda 05:00 dan 23:00 ga qadar tashkil etiladi.

“Soat 05:00 dan 06:00 gacha va 22:00 dan 23:00 gacha “Tuzel”-“Quruvchilar” bekatlari oralig‘ida bir tomonlama (chelnok) poyezdlar harakati tashkil etiladi”, deyiladi xabarda.

Biroq, metropoliten matbuot xizmati tomonidan “Texnopark” va “Yashnobod” bekatlarida ish rejimi qachondan o‘z holiga qaytishiga aniqlik kiritilmagan.