Tokio-2020: Shohsanamxon Toshpo‘latova finalga yo‘l oldi

Bugun, 30 avgust kuni Tokio Paralimpiadasining S13 klassida 200 metr masofaga individual kompleks usulida suzish bo‘yicha saralash bahslari yakunlandi.

Ayollar o‘rtasidagi bahslarda ikki nafar o‘zbekistonlik sportchi – Shohsanamxon Toshpo‘latova hamda Nigoraxon Mirzohidova ishtirok etdi. Toshpo‘latova 2:30,42 daqiqa ko‘rsatkichni qayd etib, marraga birinchi bo‘lib yetib kelgan bo‘lsa, Mirzohidova 2:40,44 daqiqa natija bilan 5-o‘rinda keldi. 

Shohsanam Toshpo‘latova finalga yo‘l oldi. Ayollar o‘rtasida S13 klassida 200 metr masofaga individual kompleks usulida suzish bo‘yicha final bahsi bugun, 30 avgust kuni Toshkent vaqti bilan soat 15:42 da boshlanadi.

Shuningdek, erkaklar o‘rtasida Firdavsbek Musabekov 2:18,78 daqiqa natija ko‘rsatib, marraga 5-bo‘lib yetib keldi va saralashdan o‘ta olmadi.

Eslatib o‘tamiz, O‘zbekiston delegatsiyasiga ilk medalni suzuvchi Islam Aslanov keltirgan edi. U 100 metrga batterflay usulida suzish bo‘yicha bronza medalini qo‘lga kiritgan.