Toshkent shahrida sex hududida yong‘in kelib chiqdi

Bugun, 10 may kuni soat Toshkent shahar Bektemir tumanida joylashgan sexda yong‘in kelib chiqdi.

Bu haqda ma’lumot soat 13:10 lar atrofida FVB Yong‘in xavfsizligi boshqarmasi Yong‘inni o‘chirish kuch va vositalarini boshqarish va muvofiqlashtirish markaziga yetib kelgan.

Ma’lum bo‘lishicha, yong‘in Bektemir tumani Chirchiq bo‘yi ko‘chasi 12-uyda joylashgan “Kuchli qurilish mollari” MCHJga qarashli bitum ishlab chiqarish sex hududida sodir bo‘lgan.

Xabar asosida hududga zudlikda 7 ta asosiy va 1 ta yordamchi yong‘in o‘chirish ekipajlari jalb etilgan. Birinchi bo‘linmalar soat 13:14 da voqea joyiga yetib kelib, yong‘in soat 13:25 da qurshab olingan va soat 13:33 da to‘liq bartaraf etilgan. Ko‘rilgan tezkor harakatlar natijasida yong‘in keng maydonlarga tarqalishi oldi olingan. 

Yong‘in oqibatida, sex hududidagi bitum mahsulotini tashishga mo‘ljallangan 30 tonnalik bo‘sh turgan maxsus tirkamali sig‘imning shinalari va 1 ta 15 tonnalik sig‘imdagi bitum mahsuloti qisman yongan. Hodisa oqibatida tan jarohati olganlar va halok bo‘lganlar yo‘q. Yong‘inning tahminiy sababi, sexda texnologik jarayonning buzilishi. Moddiy zarar miqdori aniqlanmoqda.