Temir yo‘lda bojxona nazoratidan o‘tkazish qoidalari tasdiqlandi

Davlat bojxona qo‘mitasi, Moliya vazirligi, Transport vazirligi va Markaziy bank Boshqaruvining qo‘shma qarori bilan Temir yo‘l transporti yo‘lovchilarining qo‘l yukini, bagajini, valyutasini va valyuta boyliklarini bojxona nazoratidan o‘tkazish va rasmiylashtirish tartibi to‘g‘risidagi nizom tasdiqlandi.

Jismoniy shaxslar qo‘l yukida va kuzatib borilayotgan bagajida notijorat maqsadlarda tovarlarni bojxona chegarasi orqali olib o‘tayotganda bir vaqtning o‘zida tovarlarni taqdim etgan holda deklaratsiyalaydi.

Qiymati yoki miqdori qonun hujjatlarida belgilangan bojsiz olib kirish normalaridan ortiq bo‘lgan tovarlarning ortiq qismiga nisbatan bojxona to‘lovlari solinadi.

Jo‘nab ketayotgan va kirib kelayotgan yo‘lovchilar, ularning qo‘l yuki, bagaji, valyuta va valyuta qimmatliklarini bojxona nazoratidan o‘tkazish va rasmiylashtirish, odatda, belgilangan tartibda o‘tkazish punktlari xonalarida (ko‘rikdan o‘tkazish zallarida), shuningdek belgilangan hollarda – poyezdlarda ularning to‘xtab turish vaqtida amalga oshiriladi.

Bagajning bojxona rasmiylashtiruvi temir yo‘l vokzallari, stansiyalari yuk bagaji bo‘linmalarining belgilangan joylarida va bojxona organi tomonidan belgilanadigan boshqa joylarda amalga oshiriladi.

Nizomda barcha turdagi bojxona ko‘zdan kechiruvi va bojxona ko‘rigi uchun vaqt me’yorlari belgilangan, xususan bitta yo‘lovchining qo‘l yuki, bagaji, valyuta va valyuta qimmatliklarining bojxona ko‘rigi, bojxona ko‘zdan kechiruvi hamda yo‘lovchi bojxona deklaratsiyasini rasmiylashtirish 1,5 daqiqa ichida, yo‘lovchini shaxsiy ko‘rikdan o‘tkazish zarurat bo‘lganda 30 daqiqa ichida amalga oshiriladi.

Yo‘lovchilarning, shuningdek poyezd brigadasi a’zolarining qo‘l yukini, bagajini, valyutasini va valyuta boyliklarini rasmiylashtirish belgilangan shaklda 2 nusxada bojxona deklaratsiyasini rasmiylashtirgan holda, bojxona rasmiylashtiruvi joylarida amalga oshiriladi.

Yo‘lovchi tashish poyezdida qo‘l yuki va bagaj tashishning alohida qoidalari belgilandi. Xususan, qo‘l yukini yo‘lovchilar uchun mo‘ljallangan joylarga, shuningdek o‘tirg‘ichlar o‘rtasidagi o‘tish joylari, yo‘laklar, vagon maydonchalari (tamburlar)ga joylashtirishga yo‘l qo‘yilmaydi.

Temir yo‘l rahbariyati bir vaqtning o‘zida bitta temir yo‘l stansiyasiga ikki va undan ortiq poyezd tarkibining kirib kelishi yoki chiqib ketishini istisno qiladigan yo‘lovchi tashish poyezdlarining harakat jadvali ishlab chiqilishini ta’minlashi shart.