Tehronda fransuz tili markazi josuslikda ayblanib yopildi

Fransiya Eron hukumati Tehrondagi elchixonasiga qarashli fransuz tili markazini yopganidan so‘ng Eron elchisini chaqirib, tegishli choralar ko‘rishini bildirdi. Bu haqda Fransiya Tashqi ishlar vazirligi xabar berdi.

“Erondagi Fransiya madaniy huzuriga qarshi ushbu yangi hujum, joriy yilning o‘tgan iyul oyida Fransiya elchixonasining ikki xodimiga qilingan hujumdan keyin sodir bo‘ldi va uni oqlab bo‘lmaydi hamda qabul qilib bo‘lmaydi”, degan Fransiya Tashqi ishlar vazirligi matbuot kotibi Paskal Konfavryo bayonotida.

Ikki davlat o‘rtasidagi munosabatlar Eronning yadroviy dasturi va Tehron tomonidan bir necha nafar Fransiya fuqarosining ushlab turilishi sabab yillar davomida tarang bo‘lib kelgan.

Fransiya fuqarolari ozod qilinganidan keyin va Parij AQSHning Eronga qarshi urushida ishtirok etmasligini bildirganidan so‘ng munosabatlar yaxshilangan edi. Biroq yozda Fransiyaning ikki diplomati hibsga olinib, keyin mamlakatdan chiqarib yuborilganidan so‘ng vaziyat yana keskinlashdi. Fransiya ham bunga javoban ikki nafar Eron diplomatini mamlakatdan chiqarishini ma’lum qildi.

Eronning yarim rasmiy “Tasnim” axborot agentligi kecha, 20 sentyabr kuni avvalroq Tehron prokuraturasining sud qarori asosida fransuz tili markazi yopilganini xabar qilgandi.

Eron rasmiylari markaz bir necha yil davomida xorijiy tillarni o‘qitish niqobi ostida faoliyat yuritganini va litsenziya olish haqida bir necha bor ogohlantirilganini bildirgan. Tehron markazni Eron madaniyati va milliy xavfsizligiga qarshi faoliyatda ayblagan. Jumladan, rasmiylar markaz odamlarni aniqlash va tarmoqlar tuzish, shuningdek, malakali eronliklarni mamlakatdan chiqib ketishiga ko‘maklashish bilan shug‘ullanganini aytgan.

Fransiya bunday ayblovlarni avval ham rad etgan. Parij yil boshidagi namoyishlarni bostirishdan so‘ng Eron fuqarolik jamiyatini qo‘llab-quvvatlash va u bilan aloqalarni kuchaytirishga harakat qilgan bir paytda so‘nggi oylarda qo‘rqitish holatlari kuzatilganini bildirgan.

Diplomatlarning aytishicha, Eron Fransiya tashqi ishlar vaziri Jan-Noel Barroning Mahsa Amini vafotining to‘rtinchi yilligi munosabati bilan yaqinda ijtimoiy tarmoqda qoldirgan postiga ham norozi bo‘lgan.

18 sentyabr kuni Eron tashqi ishlar vaziri Abbos Aroqchi Barroning postiga javob qaytarib, uni “timsoh ko‘z yoshlari” deb atagan va Parijni mustaqillik urushi davrida 1,5 million nafar jazoirlikni o‘ldirganlikda ayblagan.

“AQSH maktab o‘quvchilarimizni qirganda sukut saqlaganingiz hammasini ko‘rsatib qo‘ydi”, degan u. 

Aroqchi bu bilan Tehron AQSH javobgar deb hisoblaydigan Erondagi hujumga ishora qilgan. Ikki davlat Tashqi ishlar vazirlari ertaga, 22 sentyabr kuni BMT Bosh Assambleyasi doirasida dunyo yetakchilarining yillik yig‘ilishida uchrashishi kutilmoqda.