Tashkent City’dagi “dom”da yong‘in chiqdi (video)

Toshkent shahrining Shayxontohur tumanida joylashgan Tashkent City hududidagi ko‘p qavatli uyda yong‘in sodir bo‘ldi. Bu haqda Toshkent shahar Favqulodda vaziyatlar boshqarmasi xabar berdi.

Qayd etilishicha, bugun, 23 yanvar kuni soat 19:49 da Shayxontohur tumanining Botir Zokirov ko‘chasi – Tashkent City hududida joylashgan 9 qavatli uyning tom qismi yonayotgani to‘g‘risida FVBga xabar tushgan. Shunga ko‘ra, yong‘in-qutqaruv texnikalari aytilgan manzilga soat 19:53 da yetib borib, yong‘in soat 20:03 da qurshab olingan va soat 20:05 o‘chirilgan.

Bildirilishicha, yong‘in oqibatida halok bo‘lgan va jabrlanganlar yo‘q. Hozirda yong‘in sababi va keltirilgan moddiy zarar miqdori aniqlanmoqda.

Eslatib o‘tamiz, avvalroq Toshkent shahar Chilonzor tumani Kichik xalqa yo‘li ko‘chasida joylashgan go‘zallik saloni tom qismida yong‘in sodir bo‘lgan edi. Hodisa oqibatida tan jarohati olganlar bo‘lmagan.