Talabalar kontrakt pulini qancha muddatda to‘lashlari mumkin?

O‘zbekistonda davlat OTMlari talabalariga o‘quv yili davomida teng ulushlarda kamida 4 marotaba o‘qish uchun to‘lovlarni amalga oshirish imkoniyati taqdim etilgan. Bu haqda O‘zbekiston Prezidentining “2017 — 2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha harakatlar strategiyasini “ilm, ma’rifat va raqamli iqtisodiyotni rivojlantirish yili”da amalga oshirishga oid davlat dasturi to‘g‘risida”gi farmonida belgilangan.

Farmoniga asosan, 2020/2021 o‘quv yilidan boshlab:

•    OTMlarda asosiy mutaxassislikka aloqasi bo‘lmagan fanlar soni 2 baravarga qisqartiriladi;

•    O‘zbekiston OTMlariga davlat granti asosida o‘qishga qabul qilish bo‘yicha kvota bosqichma-bosqich 2 baravarga oshiriladi.

Eslatib o‘tamiz, 2020-2021 o‘quv yilida oliy ta’lim muassasalarining kunduzgi ta’lim shaklida o‘quvchi barcha talabalarga to‘lov-kontrakt uchun 10 foizlik chegirma berildi. Keyin esa Oliy va o‘rta maxsus ta’lim vazirligining shaxsi noma’lum rasmiysi chegirma kontraktning stipendiyasiz shakliga nisbatan hisoblanishi haqida bayonot berdi.