Surxondaryoda ham IIBdan o‘lik chiqqani aytilmoqda

Avvalroq, 15 fevral kuni Surxondaryo viloyatining Uzun tumanida 42 yoshli ayol va uning bolasi o‘ldirilib ketilgani, uyi esa yoqib yuborilgani xabar qilingandi. 25 fevral kuni esa mazkur ish doirasida tergovga jalb qilingan  50 yoshli fermer Tohirjon Hayitov o‘lik holda oilasiga topshirildi. Bu haqda marhumning o‘g‘li QALAMPIR.UZ’ga ma’lum qildi.

Uning aytishicha, Tohirjon Hayitov joriy yilning 23 fevral kuni taxminan 12:00 larda Surxondaryo viloyati Uzun tumanidagi yashash uyidan tergovga olib ketilgan. Oradan ikki kun o‘tib, 25 fevral kuni u o‘lik holda oilasiga topshirilgan. 

“Ushbu tergov davomida hech qanday sabab ko‘rsatilmagan xolda otamni tuhmat va bo‘hton bilan qiynoqqa solishgan hamda turli xil yo‘llar bilan jinoyatni bo‘yniga qo‘yishmoqchi bo‘lishgan”, deydi Tohirjon Hayitovning farzandi. 

Fermerning o‘limi haqida uning oila a’zolarining o‘zi jiddiy qarshilik ko‘rsatmaguncha ma’lum qilishmagan va mutasaddilar marhumning vafotiga yurak xurujini sabab sifatida ko‘rsatgan. Shuningdek, jasadning yorilishiga qaramasdan, ularga hech qanday ekspertiza xulosalari taqdim etilmagan. Hayitovning jasadi esa Sariosiyo tumanidagi o‘likxonadan topilgan.

“Otamni 2 kun o‘tgach, kecha, 25 fevral kuni yurak xurujidan vafot etdi deyishdi. Vaholanki otamning sog‘lig‘i bilan umuman muammosi bo‘lmagan. Fermer odam, dalada o‘tar edi kuni”, deydi otasining sog‘lom bo‘lgani va salomatligidan hech qachon shikoyat qilmaganini aytgan o‘g‘il.

Holatga aniqlik kiritish maqsadida QALAMPIR.UZ ikki kundan buyon Ichki ishlar vazirligi, Surxondaryo viloyat Ichki ishlar boshqarmasi va Bosh prokuraturaga so‘rov yo‘llamoqda, biroq shunga qaramasdan mulozimlar sukut saqlashni afzal ko‘rmoqda.

Eslatib o‘tamiz, oldingi haftada ikki kun ichida jazoni ijro etish koloniyasidan 2 o‘lik chiqqani xabar qilingandi.