Suriyada muvaqqat hukumat rahbari tayinlandi

Muhammad al-Bashir o‘zining Suriya muvaqqat hukumatining rahbari etib tayinlanganini e’lon qildi. Bu haqda u “Al Hadath” telekanali efirida ma’lum qildi.

“Asosiy qo‘mondonlik qaroriga ko‘ra, bizga muvaqqat hukumatni shakllantirishga vakolat berildi. Dastlabki reja bo‘yicha bu 2025 yil 1 martga qadar amalga oshiriladi”, dedi al-Bashir.

Uning so‘zlariga ko‘ra, bu qaror bugun, 10 dekabr kuni qurolli qarshilik rahbariyati, “Qutqaruv hukumati” vakillari va eski hukumatning ba’zi a’zolari ishtirokidagi uchrashuvda qabul qilingan.

Ma’lumot uchun, al-Bashir ta’lim olgan sohasi bo‘yicha muhandis va yurist. U “Suriya qutqaruv hukumati” rahbari hisoblanadi. Shuningdek, al-Bashir “Hayat Tahrir ash-Shom” guruhi yetakchisi Abu Muhammad al-Jaloniyning yaqin hamkori hisoblanadi.

Eslatib o‘tamiz, avvalroq “Hayat Tahrir ash-Shom” guruhi boshchiligidagi isyonchi kuchlar Suriya poytaxti Damashqqa kirib, mamlakat rahbari Bashar Asad rejimi ag‘darilganini ma’lum qilgandi. Keyinchalik, Suriyani tark etgan Bashar Asad va uning oila a’zolari Moskvaga borgani xabar qilingandi.