Suriya xalqi tubsizlik yoqasida – BMT komissiyasi dunyoni Ukrainadan ortib, boshqa mamlakatlarga ham qarashga chaqirdi

11 yildan beri davom etayotgan mojaro yuz minglab odamlarning o‘limiga olib kelgan va mamlakat aholisining yarmidan ko‘pi o‘z uylarini tashlab ketishga majbur bo‘lgan Suriyani xalqaro hamjamiyat unuta olmaydi. Bu haqda Suriyadagi voqealarni o‘rganish bo‘yicha mustaqil xalqaro komissiya rahbari Serjiu Paulu Pineyru Jenevada taqdim etgan yangi hisobotida gapirgan. 

"Yuz minglab odamlar halok bo‘ldi, urushgacha bo‘lgan aholining yarmidan ko‘pi – 22 million kishidan iborat – boshqa joyga ko‘chirildi. 100 mingdan ortiq odam bedarak yo‘qolgan. Suriya shaharlari va fuqarolik infratuzilmasi vayron qilingan. Bugungi kunda Suriyada aholining 90 foizi qashshoqlik chegarasida yashaydi. Suriyadagi 14,6 million kishi insonparvarlik yordamiga muhtoj”, deydi Pineyru. 

Ko‘pchilik suriyaliklar, ayniqsa, mamlakat shimoli-g‘arbida hamon vayronaga aylangan chodirlarga o‘ralashib, ochlik va sovuqdan aziyat chekmoqda. Biroq, Mustaqil Xalqaro Komissiya rahbarining so‘zlariga ko‘ra, "ayrim kuchlar" yordam berishdan ko‘ra, ularni ushlab qolish uchun ko‘proq kuch va qudrat sarflayotganga o‘xshaydi. 

Kecha, 9 mart kuni BMT Mustaqil komissiyasi ekspertlari Suriyadagi zo‘ravonlik va azob-uqubatlarni eslab, xalqaro hamjamiyatni halokatli mojaroga siyosiy yechim topish bo‘yicha sa’y-harakatlarni yangilashga chaqirdi. 

Mutaxassislar o‘z hisobotida, Suriyaning ba’zi hududlarida endi faol jangovar harakatlar olib borilmayotgani, biroq mahalliy aholi hamon urushayotgan tomonlar o‘rtasida “qisilib”, qurolli kuchlar tomonidan ekspluatatsiya qilinayotganini ta’kidladi. 

“Xato qilmang, mamlakat bo‘ylab tinch aholiga qarshi zo‘ravonlik harakatlari davom etmoqda, shimoli-g‘arbiy, shimoliy va shimoli-sharqdagi portlashlardan tortib, maqsadli o‘ldirishlar, noqonuniy hibsga olishlar va qiynoqlargacha... Suriya xalqi tubsizlik yoqasida”, deya ta’kidladi Pineyru. 

Ta’kidlanishicha, hisobot 2021 yilning iyulidan dekabrigacha bo‘lgan davrni o‘z ichiga oladi.  

Hisobotda Bashar al-Asad tarafdorlari va Rossiya harbiylarining Suriya shimoli-g‘arbida uyushtirgan 14 ta hujumi haqida so‘z boradi.