Sud Saakashvilini sog‘lig‘i sababli ozod etishni rad etdi

Tbilisi shahar sudi Gruziyaning sobiq prezidenti Mixail Saakashvilini sog‘lig‘i sababli qamoqdan ozod qilish haqidagi himoyachining iltimosini rad etdi. Tegishli qarorni sudya Giorgiy Arevadze mahalliy telekanallar tomonidan jonli efirda namoyish etilgan yig‘ilishda e’lon qildi. 

“Mixail Saakashvilining advokati Shalva Xachapuridzening Mixail Saakashvilini jazoni ijro etishdan ozod qilish yoki hukmni kechiktirish haqidagi iltimosnomasi qanoatlantirilmaydi”, deydi Arevadze. 

Bugun, 6 fevral kuni Tbilisi shahar sudida yig‘ilish bo‘lib o‘tdi, unda tomonlar yakuniy so‘zlarni aytdi. 

Avvalroq “Empatiya” nodavlat tashkiloti ekspertlari Saakashvilining tanasida og‘ir metallar, jumladan simob izlarini aniqlagan edi. Ularning so‘zlariga ko‘ra, siyosatchiga qamoq jazosi bilan to‘g‘ri kelmaydigan o‘nta tashxis qo‘yilgan. Gruziya Adliya vazirligining maxsus jazoni ijro etish xizmati Saakashvilidan olingan testlar zaharli moddalar yo‘qligini ko‘rsatganini ma’lum qildi. Gruziya rasmiylarining pozitsiyasi shundaki, Saakashvili simulyatsiya qilmoqda. 

2022 yil dekabridan beri sudda sobiq prezidentning ozod etilishini talab qilgan Saakashvilining himoyasi iltimosnomasi bo‘yicha tinglovlar o‘tkazilmoqda. O‘ndan ortiq uchrashuvda shifokor va ekspertlar, jumladan, xorijlik ham guvoh sifatida so‘zga chiqib, sobiq davlat rahbarining ko‘plab kasalliklari borligini ta’kidladi. 

Saakashvili 2021 yil oktyabr oyida bo‘lib o‘tadigan munitsipal saylovlardan bir kun oldin Gruziyaga yashirincha kelgan, shundan so‘ng u hibsga olinib, Rustavi shahridagi qamoqxonaga joylashtirilgan. U o‘zini siyosiy mahbus deb atab, ochlik e’lon qildi. Sobiq prezidentning sog‘lig‘i yomonlashganidan keyin u qamoqxona shifoxonasiga, keyinroq esa harbiy gospitalga o‘tkazildi. 2021 yil dekabrida Saakashvili jazoni Rustavi qamoqxonasida o‘tashni davom ettirdi, biroq 2022 yilning may oyida u Tbilisidagi “Vivamed” xususiy klinikasiga olib borildi va shu kungacha o‘sha yerda qolmoqda.