SSV “Skver” yaqinidagi ommaviy to‘planishga munosabat bildirdi

Jamiyat 7022
image

Avvalroq, O‘zbekistonga kelgan rossiyalik bloger Toshkentning Amir Temur xiyobonida 150-200 nafar odamni to‘plab, tartibsizliklarga sabab bo‘lgani haqida xabar bergan edik.

Sog‘liqni saqlash vazirligi karantin choralari kuchaytirilgan vaqtda epidemiologik xavfli vaziyat yuzaga keltirilganiga o‘z munosabatini bildirdi.

Vazirlik bir necha kun muqaddam O‘zbekistonda koronavirus infeksiyasi tarqalishining oldini olish bo‘yicha Respublika maxsus komissiyasi tomonidan mavjud epidemiologik vaziyat tufayli mamlakatda barcha turdagi ommaviy bayram tadbirlari, sport musobaqalari, shuningdek, konsert, festival, teatr va kino dasturlari vaqtincha to‘xtatilishi belgilanganini eslatgan.

Bundan tashqari, 50 nafardan ko‘p bo‘lgan kishilar bir joyda, bir vaqtning o‘zida to‘planmasligi tavsiya etilayotgani ham yodga olingan.

“Biroq shunga qaramay, ayrim hollarda karantin qoidalari va cheklovlari qo‘pol ravishda buzilayotgan holatlar ham kuzatilmoqda. 

Xususan, kecha, 13 iyul kuni Toshkentdagi Amir Temur xiyobonida Instagram va Youtube ijtimoiy tarmoqlarida “Subo” nomi bilan tanilgan rossiyalik bloger S.Mamedovni kutib olish uchun 150-200 nafarga yaqin yoshlar yig‘ilgan. Ijtimoiy tarmoqlar va internet saytlarida tarqalgan ushbu tadbir aks etgan videotasvirlardan ko‘rish mumkinki, bu yig‘inda ishtirok etgan yoshlar tomonidan mamlakatimizda o‘rnatilgan ijtimoiy masofa saqlash, niqob taqish kabi karantin qoidalariga mutlaqo rioya etilmagan”, deyiladi vazirlik bayonotida.

Ta’kidlanishicha, bu holat koronavirus infeksiyasining yanada keng tarqalishi va epidemiologik vaziyat yanada og‘irlashishiga olib kelishi mumkin. Kasallikning yangi shtammlari tez yuqishi, jadal rivojlanishi hamda yashirin ravishda organizmni kuchli jarohatlashi kuzatilmoqda. Inson o‘z organizmida kechayotgan jarayonni bilmay qolishi ham mumkin.

“Shu bois, barcha fuqarolardan karantin qoidalari va cheklovlari, sanitariya va gigiyena talablariga qat’iy rioya etishga, ommaviy to‘planmaslikka chaqiramiz. Ota-onalar o‘z farzandlariga bu borada tegishli tushuntirish berishlari, ko‘pchilik to‘planadigan joylardan uzoq bo‘lishlariga e’tibor qaratishlarini so‘raymiz.

Zero, birgina e’tiborsizlik, loqaydlik, o‘zimiz va yaqinlarimiz salomatligini xavf ostiga qo‘yishi, “COVID-19” infeksiyasini yurtimiz aholisi orasida yanada keng tarqalib ketishiga sabab bo‘lishi mumkin”, deyiladi SSV xabarida.

Vazirlik O‘zbekiston Respublikasining Ma’muriy javobgarlik to‘g‘risidagi kodeksiga muvofiq, epidemiyalarga qarshi kurashish qoidalarini buzish tegishli tartibda javobgarlikka tortishga sabab bo‘lishini qayd etgan.

Sunnatilla Abdullayev
Maqolaga baho bering
Baholaganlar: 91
Reyting: 3
Teglar
SSV
t
×