SpaceX sayyohlarni orbitaga uchirdi (video)

SpaceX kompaniyasi sayyohlar bilan Crew Dragon kosmik kemasini orbitaga uchirdi. Parvozning jonli translyatsiyasi rasmiy sayt orqali olib borildi.

Ma’lumotlarga ko‘ra, SpaceX Crew Dragon kemasini kosmik sayyohlar bilan muvaffaqiyatli orbitaga uchirgan. Missiya doirasida kema Yerning qutbiy orbitasida harakat qilib, Shimoliy va Janubiy qutblar ustidan o‘tadi. 

“Ular, shuningdek, insoniyatning uzoq muddatli kosmik tadqiqot imkoniyatlarini kengaytirish va inson salomatligini o‘rganishga yordam beradigan 22 ta ilmiy tadqiqotni amalga oshiradi. FRAM2 orbitada bo‘lish davomida ekipaj ilk bor kosmosda rentgen tasvirini olishni, mushak va suyak massasini saqlab qolish uchun mashqlar o‘tkazishni hamda mikrogravitatsiya sharoitida qo‘ziqorin o‘stirishni rejalashtirgan”, deyiladi xabarda.

Parvozning asosiy homiysi Maltadan bo‘lgan asli xitoylik tadbirkor va tadqiqotchi Chun Van bo‘lgan. Biroq parvoz narxi oshkor etilmagan.

Ekipaj tarkibida Chun Van – missiya rahbari, Yannike Mikkelsen – kema uchuvchisi, Rabea Rogge – missiya mutaxassisi, Erik Filips – tibbiy ofitser sifatida ishtirok etmoqda.

Eslatib o‘tamiz, avvalroq Ilon Mask “Fox News” telekanaliga bergan intervyusida SpaceX kompaniyasi 20-30 yil ichida Marsda hech qanday Yer yordamisiz yashay oladigan sivilizatsiya yaratishni rejalashtirayotganini aytgan edi. Hozirgi loyiha bo‘yicha, butun kosmik tizimning umumiy balandligi 121 metrni (shundan kema – 50 m, tezlatkich – 71 m), diametri esa 9 metrni tashkil etadi. Yuk ko‘tarish quvvati 100-150 tonna bo‘lishi rejalashtirilgan.