Sobiq futbol yulduzi prezidentlik saylovida yutqazdi

Liberiya rahbari Jorj Vea 14 noyabr kuni bo‘lib o‘tgan prezidentlik saylovlarida mag‘lubiyatga uchradi. Saylovda 78 yoshli Jozef Boakai g‘alaba qozondi. Bu haqda CNN xabar berdi. 

“Uning demokratik g‘alabasi mintaqada so‘nggi oylarda sodir bo‘lgan to‘ntarishlarga zid keladi”, deb yozadi nashr.

2017 yilda Liberiya Prezidenti etib saylangan sobiq jahon futboli yulduzi Jorj Vea esa jamoat radiosidagi chiqishida mag‘lubiyat vaqti kelganini aytdi. 

Kecha, 17 noyabr kuni Liberiya saylov komissiyasi e’lon qilgan natijalarga ko‘ra, saylov uchastkalarining 99 foizdan ortig‘ida Jozef Boakayga 50,89 foiz va Jorj Veaga 49,11 foiz ovoz berilgan. 1,6 millionga yaqin byulletenlar hisoblab chiqilganidan so‘ng Jozef Boakai 28 mingdan sal ko‘proq ovoz to‘plagan. 

Boakai besh millionga yaqin aholisi bo‘lgan ingliz tilida so‘zlashuvchi, dunyodagi eng kambag‘al mamlakatni olti yil davomida boshqaradi. U 2006 yildan 2018 yilgacha Afrikada davlat rahbari etib saylangan birinchi ayol Ellen Jonson Serlif qo‘l ostida vitse-prezident bo‘lib ishlagan. U davlat va xususiy sektorda ko‘plab lavozimlarda faoliyat yuritgan. Yoshi kattaligiga qaramay, u o‘zidan 21 yosh kichik va yoshlar orasida nihoyatda mashhur bo‘lib qolgan Veani mag‘lub etdi.

Muxolifat dunyoga mashhur sobiq futbolchini qashshoqlik va korrupsiyaga qarshi kurash bo‘yicha bergan va’dalarini bajarmaganlikda ayblagan edi. 

Ikkala siyosatchi ham 43 foizdan sal ko‘proq ovoz olgandan so‘ng ikkinchi turga yo‘l oldi. Boakai birinchi turda atigi 7126 ovoz bilan Jorj Veani ortda qoldirdi. Saylovlar 2003 yilda tashkil etilgan va fuqarolar urushlaridan keyin tinchlikni ta’minlash maqsadida 2018 yilda mamlakatni tark etgan BMTning Liberiyada missiyasi ishtirokisiz o‘tkazilgan birinchi saylov bo‘ldi.

Liberiyaning xorijiy hamkorlari zo‘ravonlikka olib kelishi yoki saylov jarayoniga putur yetkazishi mumkin bo‘lgan har qanday xatti-harakatlarga qarshi bir qator ogohlantirishlar berdi. Saylovlarni ko‘plab xorijiy va liberiyalik kuzatuvchilar kuzatib bordi. Yevropa Ittifoqi va G‘arbiy Afrika davlatlari hamjamiyatining missiyalari ikkinchi bosqichning tinch yo‘l bilan o‘tkazilishini olqishladi.