Shveysariya Gulnora Karimova aktivlarining bir qismini O‘zbekistonga qaytarishga rozi bo‘ldi

Joriy yilning 11 sentyabr kuni Shveysariya O‘zbekistonning Birinchi Prezidenti Islom Karimovning to‘ng‘ich qizi Gulnora Karimovaga nisbatan pul yuvish ayblovi bilan ochilgan ish doirasida olib qo‘yilgan pullarni qaytarishga O‘zbekistonga qaytarishga rozi bo‘ldi. Tomonlar o‘zaro shartlar borasida kelishb oldi. Bu haqda “The Associated Press” xabar berdi.

Kelishuv doirasida 2012 yilda Gulnora Karimovaning Shveysariya banklaridagi hisobidan musodara qilingan 131 mln dollar atrofidagi pullar O‘zbekistonga qaytariladi.

Kelishuv yuridik kuchga ega bo‘lishi uchun uni rasmiylashtirish kerak. Shveysariya pullarni qaytarish uchun birgina talab qo‘ygan – aktivlar O‘zbekiston aholisining turmush sharoitini yaxshilashga qaratilgan barqaror loyihalarga sarflanishi va harajatlarning ochiq monitoringi ta’minlanishi lozim.

Gulnora Karimovadan olingan yana 650 million shveysar franki (715 mln dollar) davom etayotgan jinoiy ish doirasida “muzlatilgan” holatda qolmoqda. Shveysariya Hukumati bu pullar ham qaytariladigan bo‘lsa, ularga ham yuqoridagidek talab qo‘yiladi. Ya’ni pullar O‘zbekiston xalqining manfaatiga xizmat qilishi kerak.

Shveysariya Gulnora Karimovani xorijiy telekommunikatsiya kompaniyalarida yirik miqdorda pora olganlikda ayblab keladi.

Eslatib o‘tamiz, so‘nggi ma’lumotlarga ko‘ra, Gulnora Karimova Toshkent viloyati Zangiota tumanida joylashgan 21-sonli jazoni o‘tash Koloniyasida saqlanmoqda. U koloniyaga 2019 yilning 14 mart kuni olib kelingan va 7-otryadning 2-sektoriga (umumiy rejimdagi) joylashtirilgan.

Joriy yilning 18 mart kuni jinoyat ishlari bo‘yicha Toshkent shahar sudida Gulnora Karimova va u tomonidan tashkil etilgan jinoiy uyushma a’zolariga nisbatan jinoyat ishini ko‘rib chiqish bo‘yicha sud jarayoni nihoyasiga yetdi va sud hukmi e’lon qilindi. 

O‘tkazilgan yopiq sud majlisida sudlanuvchilar, guvohlar, jabrlanuvchilar ko‘rsatmalari tinglandi, dalillar tekshirildi va sudlanuvchilar himoyachilarining vajlari muhokama qilindi.

Sud jinoyat ishi materiallarini har tomonlama va to‘liq o‘rganib, sudlanuvchi Gulnora Karimovani jinoiy uyushma tashkil etish, tovlamachilik, o‘zlashtirish va rastrata yo‘li bilan talon-toroj qilish, jinoiy faoliyatdan olingan daromadlarni legallashtirish va boshqa jinoyatlarni sodir etganlikda aybli deb topdi.

Sud hukmi bilan Gulnora Karimovaga 13 yil 4 oy muddatga ozodlikdan mahrum qilish jazosi tayinlandi. Jinoyat qonunchiligi normalariga muvofiq hamda bir necha jinoyat va hukmlar majmui bo‘yicha jazo tayinlanganligini inobatga olgan holda jazo muddatini 2015 yil 21 avgustdan boshlab hisoblash belgilandi.

Qolgan sudlanuvchilarga ham sodir etilgan jinoyatlarning og‘irlilik va ijtimoiy xavflilik darajasi hamda ularning jinoyatlardagi ishtirokidan kelib chiqib, tegishli jazolar tayinlandi.

Xususan, sud hukmiga ko‘ra, N. Sodikovga 20 yil, O. Sviridovga 17 yil 3 oy, A. Ergashevga 18 yil 1 oy, Sh. Sabirovga 17 yil 1 oy ozodlikdan mahrum qilish jazosi, G. Avakyanga 3 yil sinov muddati bilan 5 yil 3 oy 21 kun shartli ravishda ozodlikdan mahrum qilish jazosi tayinlandi.

J. Abduraxmanov va B. Teshabayev esa javobgarlikka tortish muddatining o‘tib ketganligi munosabati bilan jinoyat uchun javobgarlikdan ozod qilindilar.