Shov-shuvli final: Senegal Afrika kubogi sohibiga aylandi

Kecha 18 yanvar kuni Marokash poytaxti Rabot shahrida Afrika kubogi final uchrashuvi bo‘lib o‘tdi. Unda Senegal terma jamoasi mezbon Marokashni 1:0 hisobida mag‘lub etib, musobaqa g‘olibiga aylandi.

Final uchrashuvining asosiy vaqtida jamoalar o‘z darvozasi daxlsizligini saqlab qoldi. Asosiy voqealar esa uchrashuvga qo‘shib berilgan daqiqalarda yuz berdi. Dastlab 90+2-daqiqada Senegal hisobni ochdi, biroq bosh hakam hujum chog‘idagi qoidabuzarlik sabab golni bekor qildi.

90+8-daqiqada Marokash foydasiga 11 metrlik jarima zarbasi belgilandi. Ushbu qarordan norozi bo‘lgan senegallik futbolchilar maydonni tark etdi. 90+20-daqiqada jamoa sardori Sadio Mane jamoadoshlarini yana maydonga qaytardi. Oradan to‘rt daqiqa o‘tib, 90+24-daqiqada Braim Dias penaltidan foydalana olmadi.

Natijada g‘olib qo‘shimcha bo‘limlarda aniqlanadigan bo‘ldi. Qo‘shimcha bo‘limlarning 94-daqiqasida Pape Gueye tomonidan kiritilgan gol Senegalni hisobda oldinga olib chiqdi. Ushbu hisob o‘yin yakuniga qadar saqlanib qoldi va Senegal Afrika kubogi chempioniga aylandi.