Шов-шувли финал: Сенегал Африка кубоги соҳибига айланди

Кеча 18 январь куни Марокаш пойтахти Работ шаҳрида Африка кубоги финал учрашуви бўлиб ўтди. Унда Сенегал терма жамоаси мезбон Марокашни 1:0 ҳисобида мағлуб этиб, мусобақа ғолибига айланди.

Финал учрашувининг асосий вақтида жамоалар ўз дарвозаси дахлсизлигини сақлаб қолди. Асосий воқеалар эса учрашувга қўшиб берилган дақиқаларда юз берди. Дастлаб 90+2-дақиқада Сенегал ҳисобни очди, бироқ бош ҳакам ҳужум чоғидаги қоидабузарлик сабаб голни бекор қилди.

90+8-дақиқада Марокаш фойдасига 11 метрлик жарима зарбаси белгиланди. Ушбу қарордан норози бўлган сенегаллик футболчилар майдонни тарк этди. 90+20-дақиқада жамоа сардори Садио Мане жамоадошларини яна майдонга қайтарди. Орадан тўрт дақиқа ўтиб, 90+24-дақиқада Браим Диас пенальтидан фойдалана олмади.

Натижада ғолиб қўшимча бўлимларда аниқланадиган бўлди. Қўшимча бўлимларнинг 94-дақиқасида Папе Гуэйе томонидан киритилган гол Сенегални ҳисобда олдинга олиб чиқди. Ушбу ҳисоб ўйин якунига қадар сақланиб қолди ва Сенегал Африка кубоги чемпионига айланди.