Shohjahon Ergashevning navbatdagi jangi sanasi ma’lum bo‘ldi

Professional boksning super yengil (-63,5 kg) vazn toifasida ringga chiqayotgan o‘zbekistonlik Shohjahon Ergashev (17-0, 15 KO) 2020 yilning boshida o‘zining navbatdagi jangini o‘tkazadi. “BoxRec” ma’lumotlari shundan darak beryapti.

Ergashev kelasi yilning 10 yanvar kuni amerikalik Kit Xanterga (11-0, 7 KO) qarshi ringga chiqadi. Jang Nyu-Jersi shtati markazi Atlantik Siti shahrida bo‘lib o‘tadi. 12 raunddan iborat jang g‘olibi ayni vaqtda Mario Barrios (25-0, 16 KO) egalik qilayotgan WBA ning “oddiy” kamari WBA Regular chempionlik kamari uchun rasmiy da’vogarga aylanadi.

Ma’lumot uchun, Kit Xanter faoliyati davomida 11 ta jang o‘tkazgan bo‘lib, 10-jangida u o‘zbekistonlik boshqa bir bokschi Sanjarbek Rahmonovga (12-2-1,6 KO) qarshi ringga chiqib, g‘olib bo‘lgandi. O‘shanda 2-raundda Sanjar Rahmonov nokdaun holatiga tushgani uchun hisob ochilgan, biroq ko‘pchilikning fikriga ko‘ra, hakamlarning yakuniy qarori bahsli bo‘lgan.

Shohjahon Ergashev bugungacha 17 jang o‘tkazib, barchasida g‘alaba qozongan.