“Sharmandali byudjet”: o‘quvchilardan 10 ming so‘mdan pul yig‘dirilgani aytilmoqda (video)

Ijtimoiy tarmoqlarda Toshkent viloyatida boshlang‘ich sinf o‘quvchilaridan “Open budget”ga ovoz yig‘ish uchun 10 ming so‘mdan pul yig‘dirilayotgani aks etgan video tarqaldi. Tasvirlarda dars paytida yosh bolalar pul olib kelishi uchun uyiga jo‘natilgani aytilgan. Holat bo‘yicha viloyat hokimligi matbuot xizmati munosabat bildirdi. 

Ma’lum qilinishicha, Toshkent viloyati Oqqo‘rg‘on tumani “Bayguli” mahallasidagi 17-maktab o‘quvchilari darsga kiritilmay, SIM-karta sotib olish maqsadida 10 ming so‘mdan 20 ming so‘mgacha pul olib kelish uchun o‘z xonadonlariga jo‘natilgan.

“Bugungi kunda keng ommalashib, xalq ovoziga aylanib borayotgan “Open budget” kampaniyasini bunday talqin qilish, bolalardan foydalanishni oqlab bo‘lmaydi”, deyiladi hokimlik xabarida.

Xabar qilinishicha, vaziyat viloyat hokimining o‘rinbosari Otabek Sultonbekov tomonidan nazoratga olingan va o‘rganish boshlangan.

Eslatib o‘tamiz, ijtimoiy tarmoqlar orqali ba’zi maktab o‘qituvchilariga “Open budget” loyihasida ovoz yig‘ish uchun majburiy topshiriq berilayotgani yuzasidan O‘zbekiston Respublikasi Maktabgacha va maktab ta’limi vaziri Hilola Umarova izoh berib, ushbu vaziyat vazirlik tomonidan jiddiy o‘rganilayotganini ma’lum qilgan edi. 

Keyinroq, 24 mart kuni ijtimoiy tarmoqlarda Surxondaryo viloyati Angor tumanidagi 36-maktab o‘qituvchilari “Open budget”ga ovoz yig‘ishga majburlangani aks etgan video tarqalgandi. Bosh prokuratura mazkur holat Surxondaryo viloyati prokuraturasi tomonidan o‘rganilayotganini ma’lum qilgan edi. 

Bundan tashqari, 25 mart kuni Iqtisodiyot va moliya vazirligi matbuot xizmati “Open budget”ga ovoz berishda Face ID yordamida identifikatsiya qilish mexanizmini joriy etish amaliyoti ko‘rib chiqilayotganini e’lon qilgandi. Keyinchalik vazir Sherzod Qudbiyev videomurojaat bilan chiqib, ushbu yangilikni rad etdi.