Senat qo‘mitasi Andijondagi shafqatsizlikning ayrim tafsilotlarini oshkor qildi

O‘zbekiston Respublikasi Oliy Majlisi Senatining Mudofaa va xavfsizlik masalalari qo‘mitasi raisi Qutbiddin Burxonov Andijon shahar Ichki ishlar boshqarmasi xodimlarining noqonuniy xatti-harakatlariga munosabat bildirdi va jinoyat ishining ayrim tafsilotlarini oshkor qildi.

“Ijtimoiy tarmoqlarda Andijon shahar ichki ishlar boshqarmasi xodimlarining noqonuniy xatti-harakatlari bir fuqaroning hayotiga zomin bo‘lganligi bilan bog‘liq holat keng muhokama etilayotir. Ushbu holat bo‘yicha o‘tkazilgan xizmat tekshiruviga ko‘ra, Andijon shahar Ichki ishlar boshkarmasi Jinoyat-qidiruv bo‘limi tezkor vakili E.Rayimjonov hamkasblari F.Xusanboyev va Q.Qodirovlar bilan birga fuqaro A.Sotvoldiyevning qimmatbaho toshini olib, qaytarib bermayotgan A.Abdukarimovga nisbatan qonuniy chora ko‘rishni so‘rab yozgan arizasi yuzasidan o‘zboshimchalik bilan tekshiruv olib borishgan.

2020 yil 29 may kechasi Andijon shahar Navro‘z mahallasida yashovchi A.Abdukarimovning xonadoniga tezkor vakil E.Rayimjonov  F.Xusanboyev bilan birga borib, uni Ichki ishlar bo‘limi ma’muriy binosiga olib kelib psixologik va jismoniy bosim o‘tkazib, 30 may ertalab soat 06:00 ga qadar noqonuniy ushlab turib, uning huquqlari, qonuniy manfaatlari va sog‘lig‘iga jiddiy zarar yetkazganlar.

Oqibatda, fuqaro tan jarohat olib, hushini yo‘qotgan va respublika shoshilinch tibbiy yordam ilmiy markazi Andijon viloyat filialiga yotqizilgan. Jabrlanuvchi A.Abdukarimovga shifokorlar tomonidan zarur tibbiy yordam ko‘rsatilishiga qaramasdan, olgan og‘ir tan jarohatlari tufayli fuqaro 2020 yil 11 iyunda vafot etgan.

Joriy yilning 30 may kuni Andijon shahar prokuraturasi tomonidan katta leytenant F.Xusanboyev, katta leytenant E.Rayimjonov va katta leytenant Q.Qodirovlarga nisbatan  jinoyat ishi qo‘zg‘atilib, qamoqka olish ehtiyot chorasi qo‘llanilgan. 

Shu o‘rinda aytish kerakki, Oliy Majlis Senatining Mudofaa va xavfsizlik masalalari qo‘mitasi tomonidan joriy yilning may oyida o‘tkazilgan  huqubuzarliklar profilaktikasi, jinoyatchilikka qarshi kurashish  holatini o‘rganish jarayonida Andijon shahar ichki ishlar idoralari faoliyatidagi bir qator salbiy holatlar qayd etilib, IIO FMB boshlig‘i podpolkovnik Sodiq Usmanovning egallab turgan lavozimiga qanchalik loyiq ekanligi masalasi ko‘tarilgan edi. Bu jihat Qo‘mitamizning 25 may kuni Andijon viloyatida o‘tkazilgan  sayyor  majlisida qabul qilingan qarorda ham aks ettirilgan. 

Oliy Majlis Senatining Mudofaa va xavfsizlik masalalari qo‘mitasi bu kabi holatlarni qat’iy qoralaydi va kelajakda  jinoyatchilikning  oldini olish bo‘yicha aniq choralar ko‘rilishini  talab qiladi.

O‘zbekiston Respublikasi Ichki ishlar vazirining 2020 yil 14 iyun kungi buyrug‘i bilan podpolkovnik Sodik Hakimmurzayevich Usmanov egallab turgan lavozimidan ozod etildi.

Andijon shahrida sodir bo‘lgan mazkur holat Qo‘mitamiz tomonidan nazoratga olindi va biz adolat to‘liq qaror topishini, bunday fojialar boshqa takrorlanmasligini ta’minlash uchun barcha imkoniyatlarimizni ishga solamiz", deb qayd etdi senator.

Eslatib shtamiz, Andijon shahar IIO FMB 4-son IIBning xodimlari fuqaro A.A.ni IIB ma’muriy binosiga olib kelib, uning hayoti va sog‘ligi uchun xavfli bo‘lgan zo‘rlik ishlatib, noqonuniy ravishda ushlab turgan. A.A. sog‘lig‘i yomonlashganligi sababli Andijon shahar IIO FMB 4-son IIBdan Respublika shoshilinch tibbiy yordam ilmiy markazi Andijon filialiga yotqizilgan va 11 iyun kuni vafot etgan.

Holat bo‘yicha dastlab ma’lumot bergan Bosh prokuratura IIBning uch nafar xodimiga nisbatan ayblov e’lon qilingan, ular qamoqqa olingani, hozirda jinoyat ishi bo‘yicha dastlabki tergov harakatlari olib borilayotgani haqida ma’lum qilgandi.

Undan so‘ng, IIVning o‘zi bayonot bilan chiqdi. Vazirlik bergan ma’lumotga ko‘ra, Andijon shahar IIO FMB 4-son ichki ishlar bo‘limi jinoyat qidiruv guruhi tezkor vakillari katta leytenant F.Husanboyev, katta leytenant E.Rayimjonov va katta leytenant Q.Qodirov ichki ishlar organlaridan bo‘shatilgan. Andijon shahar IIO FMB boshlig‘i podpolkovnik S.Usmanovdan tashqari, Andijon shahar IIO FMB 4-sonli ichki ishlar bo‘limi boshlig‘i podpolkovnik P.Mamajonov egallab turgan lavozimlaridan ozod etilgan. Bundan tashqari, 19 nafar rahbar va xodimlarga turli ko‘rinishdagi qat’iy intizomiy tartibdagi jazolar qo‘llanilgan.