Savdo urushi: AQSH Kanadadan alkogol va mototsikl importini taqiqladi

AQSH joriy yilning 29 sentyabridan Kanadadan keng turdagi alkogol mahsulotlari, mototsikllar va ayrim sut mahsulotlarini import qilishni taqiqlaydi. Bu haqda Oq uy xabar berdi.

Oq uy saytida e’lon qilingan yangi choralar AQSH va Kanada o‘rtasidagi savdo nizosining yanada keskinlashganini ko‘rsatmoqda. Taqiqlar Kanada tomonidan AQSH tovarlariga joriy etilgan javob tariflari kuchga kirganidan bir necha soat o‘tib e’lon qilindi.

Kanada hukumati AQSHning o‘tgan oyda qariyb 20 milliard dollarlik Kanada tovarlariga 50 foizlik tarif joriy qilganidan so‘ng qarshi choralar ko‘rgan. Ottavaning yangi tariflari po‘lat, mebel, kiyim-kechak va elektronika kabi mahsulotlarga nisbatan 15 foizdan 50 foizgacha bo‘lgan bojlarni qamrab oladi.

AQSHning yangi taqiqlari esa pivo va turli xil sharoblardan tashqari viski, burbon, rom, araq, vermut, tekila, meskal va brendi kabi alkogol mahsulotlarining aksariyatiga taalluqli bo‘lishi mumkin. Sut mahsulotlari bo‘yicha esa zardob proteini, invert va shakarqamish melassasi hamda alkogolsiz pivo import qilinishi taqiqlanadi.

Shuningdek, ayrim pishloq mahsulotlari import taqiqiga emas, balki 50 foizlik tarif qo‘llanadigan mahsulotlar ro‘yxatiga kiritildi. Qog‘oz, alyuminiy, yog‘och, mebel va yoritish mahsulotlarining ayrim turlariga ham qo‘shimcha tariflar belgilandi.

AQSH rasmiylaridan biri Prezident Donald Trampning Kanadadan import qilinadigan avtomobil mahsulotlariga tarifni 25 foizdan 50 foizga oshirish tahdidi hamon kuchda ekanini aytgan. Bu chora 2027 yil 1 yanvardan amalga kirishi mumkin.

Kanada Bosh vaziri Mark Karni savdo nizosi sharoitida mamlakat AQSHga iqtisodiy qaramlikni kamaytirishga harakat qilishini bildirgan.

“Bizda yo‘nalishimizni o‘zgartirish va taraqqiy etish uchun kerak bo‘lgan barcha narsa bor. Bu o‘zgarishning qiymati bo‘ladi, ammo harakat qilmaslik narxidan ancha past”, degan Karni.

Kanada Savdo vaziri Dominik Leblan AQSH savdo vakili Jeymison Grir bilan aloqada ekanini bildirib, Vashingtonning yangi choralarini tanqid qilgan. Uning ta’kidlashicha, hukumatning asosiy maqsadi Kanada ishchilari, fermerlari, oilalari va kompaniyalarini AQSHning “asossiz harakatlari”dan himoya qilishdir.

Ikki davlat o‘rtasidagi nizo Shimoliy Amerikadagi erkin savdoni ta’minlab kelgan AQSH – Meksika – Kanada kelishuvining kelajagi borasida ham xavotirlarni kuchaytirmoqda. Mutaxassislar tariflar yanada oshirilishi ikki mamlakat iqtisodiyoti uchun salbiy oqibatlarga olib kelishi mumkinligidan ogohlantirmoqda.

Kanadadan AQSHga eksportning qariyb 68 foizi joriy yilda AQSH bozoriga yo‘naltirilgan. Ularning taxminan 80 foizi USMCA kelishuvi doirasida bojsiz amalga oshirilgan.

Tramp so‘nggi kunlarda Kanadaga nisbatan tanqidlarini kuchaytirdi. U, xususan, Kanadadagi Bombardier samolyot ishlab chiqaruvchisi AQSHda samolyot sotishni davom ettirishi uchun ishlab chiqarishni mamlakat hududiga ko‘chirishi kerakligini aytdi.

Shuningdek, Tramp Kanada va Meksikani AQSH bayrog‘i bilan qoplangan Shimoliy Amerika xaritasini tarqatgan hamda Karnini yana “gubernator” deb atagan. Bu uning Kanada AQSHning 51-shtatiga aylanishi kerakligi haqidagi avvalgi bayonotlariga ishora bo‘ldi.

Ma’lumot o‘rnida, “Reuters/Ipsos” so‘roviga ko‘ra, amerikaliklarning atigi 20 foizi Tramp ma’muriyatining Kanada tovarlariga tariflarini qo‘llab-quvvatlagan.

Eslatib o‘tamiz, Kanada AQSH bilan savdo muzokaralari to‘xtab qolgach, AQSH tovarlariga javob tariqasida joriy etgan tariflarini 8 sentyabr kuni yarim tundan keyin kuchga kiritgandi.