Saudiya Britaniya boshchiligidagi qiruvchi samolyotlar yaratish dasturiga qo‘shilishi mumkin – The Telegraph

Britaniya Saudiya Arabistonining Italiya va Yaponiya bilan birgalikda yangi avlod qiruvchi samolyotlarini yaratish loyihasida ishtirok etish haqidagi iltimosini ko‘rib chiqyapti. Bu haqda The Telegraph xabar bermoqda.

Qirollikning Global jangovar havo dasturi (GCAP)ga qo‘shilishi 2035 yilgacha yuqori darajada rivojlangan, eksport qilinadigan qiruvchi samolyot ishlab chiqarish rejasini muvaffaqiyatli amalga oshirishga yordam berishi mumkin.  Ayniqsa Xitoydan uzoqlashib borayotgan G‘arb uchun Saudiya Arabistoni ushbu loyihaga yaxshigina mablag‘ tikish imkoniyati bilan ahamiyatlidir.

Saudiya Arabistoni Qirolligi Buyuk Britaniyaning strategik sherikliklaridan biri hisoblanadi. 

Financial Times nashriga ko‘ra, Ar-Riyod GCAP'ni moliyalashtirish va potensial muhandislik tajribasi uchun milliardlab dollar mablag‘ tikishni va’da qilishi ehtimoldan holi emas. Loyihada ishtirok etishi orqali Saudiya Arabistoni mudofaa texnologiyalari va qurollari ishlab chiqaruvchisiga aylanishi va zamonaviy qurollar importchisi "maqomi"dan qutulib, aksincha eksportchisiga aylanishi mumkin.

Eurofighter loyihasidagi to‘rt hamkor davlatlardan biri bo‘lgan Germaniya Ar-Riyodning ushbu dasturga qo‘shilishiga qarshi. 2018 yilda Germaniya qirollikning Yamandagi mojarodagi ishtiroki va jurnalist Jamol Qoshiqchining o‘ldirilishiga javoban Saudiya Arabistoniga nisbatan qurol embargosini ​​joriy qilgan edi.

Ma’lumot o‘rnida, Saudiya Arabistoni mudofaa importiga dunyodagi eng katta mablag‘ sarflaydigan davlatlardan biri hisoblanadi. Qirollikni asosan Qo‘shma Shtatlar zamonaviy qurol-yarog‘ bilan ta’minlaydi. Shunga qaramay, so‘nggi yillarda Ar-Riyod ichki mudofaa loyihalariga milliardlab dollar yo‘naltiryapti.

Shu hafta boshida Qirollik Turkiyaning Baykar dron ishlab chiqaruvchisi bilan Saudiya hududida uchuvchisiz samolyotlarni ishlab chiqarish haqida shartnoma imzoladi.

Akobir Sayidov