Samolyot halokatidan so‘ng Janubiy Koreya aeroportlarini rekonstruksiya qiladi

Janubiy Koreya Transport vazirligi Jeju Air aviakompaniyasiga tegishli Boeing 737-800 samolyoti Muan aeroportida uchish-qo‘nish yo‘lagidan chiqib ketib,  qulab tushganidan so‘ng mamlakatning barcha aeroportlarida samolyotlarning qo‘nish mayoq konstruksiyalarini almashtirish rejasini e’lon qildi. Bu haqda “Reuters” xabar berdi.

Agentlikka ko‘ra, yettita aeroportda, jumladan, Muanda beton yoki po‘latdan yasalgan poydevorlar almashtirilishi kerakligi aniqlangan. Tuzilmalarni almashtirish 2025 yil oxirigacha yakunlanishi rejalashtirilgan.

Aviatsiya xavfsizligi bo‘yicha mutaxassislar beton poydevorga sopol mayoq o‘rnatilishini tanqid qilishgan va bu to‘qnashuvda halok bo‘lganlar sonini oshirishi mumkinligini aytgan. 

Hukumat, shuningdek, Boeing 737-800 samolyotida parvoz qilgan oltita aviakompaniya xavfsizligini tekshirishni yakunlagan, bunda ba’zi operatorlar tomonidan qoidabuzarliklar, jumladan, samolyot nuqsonlarini tuzatish yoki yo‘lovchilarni o‘rnatish tartib-qoidalariga rioya qilmaslik aniqlangan.

Shuningdek, Transport vazirligi Muan aeroportining yopilishi 19 yanvargacha davom etishini e’lon qilgan.

Eslatib o‘tamiz, 29 dekabr kuni Janubiy Koreyadagi aeroportda bortida 181 kishi bo‘lgan samolyot halokatga uchragandi. Samolyot mamlakat janubi-g‘arbidagi Muan xalqaro aeroportida uchish-qo‘nish yo‘lagidan chiqib ketgan va qo‘nish yo‘lagi tashqarisidagi to‘siqqa urilib, yonib ketgan.

Xabar qilinishicha, ichida 175 yo‘lovchi va olti nafar bort xodimi bo‘lgan Jeju Air samolyoti Tailandning Bangkok shahridan qaytayotgan va qo‘nayotgan vaqtda avariyaga uchragan. Yo‘lovchilarning 173 nafari Janubiy Koreya fuqarosi va ikki nafari Tailand fuqarosi bo‘lgan. Halokatga uchragan Boeing bir kun oldin ham bortdagi favqulodda vaziyat to‘g‘risida xabar bergan. O‘shanda havo kemasi parvozni davom ettirishdan oldin majburiy qo‘nishni amalga oshirgan. So‘nggi ma’lumotlarga ko‘ra, 179 kishi halok bo‘lgan. Omon qolgan ikki kishi – bir yo‘lovchi va ekipaj a’zolaridan biri.