Samarqanddagi savdo do‘konlaridan biriga o‘t ketdi

Bugun, 29 oktyabr kuni Samarqand viloyatining Samarqand tumanida savdo do‘konlaridan birida katta yong‘in sodir bo‘ldi. Bu haqda viloyat Favqulodda vaziyatlar boshqarmasi ma’lum qildi.

Qayd etilishicha, yong‘in Samarqand tumani Xo‘ja Ahror Valiy mahallasining G‘alaba ko‘chasida joylashgan savdo do‘konlaridan birida sodir bo‘lgan. Soat 09:04 da viloyat FVBga xabar berilgan. Shunga ko‘ra, 3 ta yong‘in-qutqaruv ekipaji jalb qilinib, voqea joyiga soat 09:11 da yetib borib, soat 09:40 da yong‘in to‘liq bartaraf etilgan.

Yong‘in oqibatida savdo do‘konining shift, tom qismi va kiyim-kechak mahsulotlari yonib zararlangan. Hodisada jabrlangan va halok bo‘lganlar yo‘q. Hozirda tergovga qadar tekshiruv harakatlari olib borilmoqda.

Eslatib o‘tamiz, avvalroq Toshkent shahar Shayxontohur tumani Zarqaynar ko‘chasida joylashgan do‘konlarning birida yong‘in chiqqandi. Oqibatda kiyim do‘konining 15 kvadrat metr maydonda joylashgan ichki qismi yonib, zararlangandi.