Samarqandda maktab o‘quvchisi avtohalokatga uchrab vafot etdi

Samarqand viloyati Jomboy tumanida 10-sinf o‘quvchisi Maftuna Qahramonova 19 fevral kuni soat 11:00 lar atrofida (dars vaqtida) avtohalokatga uchrab vafot etdi. U o‘g‘irlab ketilgan bo‘lishi mumkin. Bu haqda uning yaqinlari QALAMPIR.UZ’ga ma’lum qildi. 

Marhumaning yaqinlariga ko‘ra, qiz tuman markazi tomon harakatlanayotgan Gentra rusumli avtomashinada halokatga uchragan. Qizning yaqinlari voqea joyida uni tanib bo‘lmas darajada va bir poy poyabzalisiz topishgan. Uning ikkinchi poy poyabzali esa voqeadan bir necha kun o‘tib avtohalokat sodir bo‘lgan joydan ikki ko‘cha naridan, ariq ichidan topilgan. Shunga ko‘ra qizning yaqinlari u o‘g‘irlab ketilgan bo‘lishi mumkinligiga ishonmoqda.

Marhumaning ukasi ham bir necha bor uni darsdan so‘ng bir yigit olib qochib ketishga uringani va bundan opasini himoya qilganini aytgan.

Qizning yaqinlarining ma’lum qilishicha, voqeaga guvohlar qiz boshidan og‘ir zarba yeb, mashinaga majburan sudrab olib chiqilganini ko‘rishgan.

QALAMPIR.UZ holat yuzasidan rasmiy axborot olish uchun Samarqand viloyati Yo‘l harakati xavfsizligi xizmati bilan bog‘landi. Ammo YHXX matbuot kotibi mazkur holat bo‘yicha hech qanday axborotga ega emasligini ma’lum qildi.

Eslatib o‘tamiz, avvalroq ham Samarqand viloyatining ayni shu tumanidagi 54-maktabning 11-sinf o‘quvchisi Lacetti boshqarib ketayotib, daraxtga urilgan va vafot etgandi.