Samarqandda 9 nafar rahbar jarimaga tortildi

Samarqand viloyatida 8 ta tuman va 1 ta shahar Tibbiyot birlashmasining rahbar xodimlari jarimaga tortildi. Bu haqda O‘zbekiston Respublikasi Prezidenti huzuridagi Davlat xizmatini rivojlantirish agentligi xabar berdi.

Ma’lum qilinishicha, Davlat xizmatini rivojlantirish agentligi Samarqand viloyati filiali tomonidan viloyatdagi sog‘liqni saqlash tizimi tashkilotlarida xodimlarni ochiq tanlov asosida ishga qabul qilish holati monitoring qilingan.

Monitoring davomida 11 ta tuman tibbiyot birlashmalarida 22 ta holatda mavjud vakant lavozimlarga ochiq tanlovlarsiz hamda tanlov g‘olibi aniqlangunga qadar “v.b.” sifatida xodimlarini ishga olish holatlari aniqlangan.

Unga ko‘ra, Bulung‘ur, Jomboy, Narpay, Nurobod, Payariq, Paxtachi, Toyloq, Samarqand tumanlari va Samarqand shahar Tibbiyot birlashmalarining 9 nafar rahbar xodimlari jami 23 million 100 ming so‘m miqdorida ma’muriy jarimaga tortilgan.

Shuningdek, noqonuniy ishga qabul qilinganlar bo‘yicha 22 ta buyruq bekor qilinib, tashkilotlarning Inson resurslarini rivojlantirish va boshqarish bo‘limlari boshliqlariga intizomiy chora qo‘llash uchun viloyat Sog‘liqni saqlash boshqarmasiga taqdimnoma kiritilgan.