Samarqandda 16 yoshli bola daraxt bosib qolishidan vafot etdi

Joriy yilning 30 mart kuni Samarqand viloyati Payariq tumanida 16 yoshli bola daraxt yiqitish jarayonida vafot etdi. Bu haqda QALAMPIR.UZ manbasi xabar berdi.

Holatga aniqlik kiritish maqsadida QALAMPIR.UZ Bosh prokuratura matbuot kotibi Hayot Shamsutdinov bilan bog‘landi. Uning ma’lum qilishicha, 30 mart kuni soat 11:00 larda Payariq tuman Ichki ishlar boshqarmasiga “Ilg‘or” MFYda yashovchi 2008 yilda tug‘ilgan bola o‘z uyida daraxt yiqitish jarayonida baxtsiz hodisa sababli og‘ir tan jarohati olib, Chelak shifoxonasiga olib kelinganligi to‘g‘risida xabar kelib tushgan.

Aniqlanishicha, bola yashash xonadonida daraxt kesish jarayonida daraxtning kesilgan shoxi uning ustiga tushib ketgan. Oqibatda bola tan jarohati olib, oila a’zolari tomonidan zudlik bilan Chelak shifoxonasining jonlantirish bo‘limiga olib kelingan. Shifokorlar tomonidan ko‘rsatilgan tibbiy yordamga qaramasdan bola vafot etgan.

Qayd etilishicha, mazkur holat tuman prokuraturasi tomonidan nazoratga olingan bo‘lib, IIB tomonidan tergovga qadar tekshiruv harakatlari olib borilmoqda.

Eslatib o‘tamiz, 19 fevral kuni Samarqand viloyati Jomboy tumanida 10-sinf o‘quvchisi dars vaqtida avtohalokatga uchrab vafot etgandi.