Saloh Aguerodan o‘zib ketdi

“Liverpul” vingeri Muhammad Saloh kecha, 20 oktyabr kuni “Chelsi” bilan Angliya chempionati doirasida bo‘lib o‘tgan uchrashuvda (2:1) gol va golli uzatmaga mualliflik qildi. 32 yoshli misrlik futbolchi o‘yinning 29-daqiqasida penaltini aniq amalga oshirib, hisobni ochdi. 51-daqiqada hujumchi yakuniy hisobni o‘rnatgan Kertis Jonsga uzatmani amalga oshirdi va “Manchester Siti”ning sobiq hujumchisi Serxio Agueroning natijasini yangiladi.

Hozirda futbolchi APLda “Liverpul” safida 232 ta samarali harakat qilgan – 160 ta gol va 72 ta golli uzatma. Saloh bitta klub tarkibida Angliya chempionatida gol+pas tizimidan foydalangan holda eng ko‘p ochko to‘plagan futbolchilar ro‘yxatida 6-o‘rinni egalladi. Bu borada Aguero hisobida 231 ochko bor.

Salohning navbatdagi maqsadi Frenk Lempard 237 ochkolik natijasidan o‘zib ketish hisoblanadi. Ueyn Runi gol+pas tizimidan foydalangan holda 276 ochko bilan 1-o‘rinni band etgan.

Joriy mavsumda misrlik futbolchi Angliya chempionatining 8 ta uchrashuvida 5 ta gol urdi va xuddi shuncha golli uzatmani amalga oshirdi.