Saakashvili ovqat yemasa, biz uni majburlay olmaymiz – Adliya vazirligi

Gruziyaning sobiq prezidenti Mixail Saakashvili o‘zi uchun yaratilgan barcha sharoitlarga qaramay, to‘liq ovqatlanishdan bosh tortishda davom etmoqda. Bu haqda Gruziya Adliya vaziri Rati Bregadze brifingda ma’lum qildi. 

"Mahbus Saakashvili haligacha davolanish kursiga to‘liq rioya qilmayapti va shifokorlar tavsiya qilgan ovqatni iste’mol qilmayapti. Biz mahbusning va uning sog‘ayib ketishidan chin dildan manfaatdor bo‘lgan odamlarni, ildizi yo‘q bo‘lib ketgan hiyla-nayranglar o‘rniga, shifokorlar tavsiyalariga amal qilishga, shifokorlar aytganidek miqdorda va bir xil turdagi taomlarni iste’mol qilishga chaqiramiz”, deydi u. 

Vazirning aytishicha, Saakashvili o‘ziga zarar etkazish bilan shug‘ullanyapti

Unga ko‘ra, sobiq prezidentning sog‘lig‘i o‘z qo‘lida, agar odam o‘z xohishi bilan davolanmasa va faqat o‘zi xohlagan taomni iste’mol qilsa, vazirlik uni yeb-ichishga yoki davolanishga majburlay olmaydi. 

Vazirning ta’kidlashicha, Saakashvili istiqomat qilayotgan “Vivamed” klinikasida unga barcha sharoitlar yaratilgan va uning barcha huquqlari hurmat qilinadi.

4 iyul kuni Saakashvili Tbilisi shahar sudining 2007 yildagi mitingni tarqatib yuborish bo‘yicha ishi yuzasidan bo‘lib o‘tgan sud majlisida videoaloqa orqali ishtirok etdi. Sud zaliga qo‘yilgan ekranda sobiq prezident o‘ta og‘ir vaziyatda ko‘rinish bergani aytilmoqda.  

Sobiq prezident Gruziyaga 2021 yil oktyabr oyida bo‘lib o‘tadigan munitsipal saylovlardan bir kun oldin yashirincha kelgan, shundan so‘ng u hibsga olinib, Rustavi shahridagi qamoqxonaga joylashtirilgan. U bir nechta jinoiy ishlarda ayblanmoqda. 2022 yil may oyida sog‘lig‘i yomonlashgani sababli u Tbilisidagi "Vivamed" xususiy klinikasiga olib ketilgan va u shu kungacha o‘sha yerda qolmoqda. Gruziya rasmiylarining pozitsiyasi shundan iboratki, Saakashvili qamoqdan chiqish uchun o‘zini og‘ir ahvolda deb ko‘rsatmoqda.