Ruminiyada NATOning Yevropadagi eng yirik harbiy bazasi qurilmoqda

NATOning Yevropadagi eng yirik harbiy bazasi Ruminiya hududida qurilmoqda. U Ruminiya harbiy-havo kuchlarining “Mixail Kogelnichanu” 57-havo bazasini kengaytirish natijasida 2040 yilgacha foydalanishga topshirilishi mumkin. Bu haqda Ruminiya televideniyesi xabar berdi.

“Mamlakat janubi-sharqidagi Konstansa okrugida joylashgan Mixail Kogelnichanu qishlog‘ida oldindan mavjud bo‘lgan, bir necha ming gektar maydonni egallagan harbiy majmuani kengaytirish ishlari boshlandi”, deya xabar berdi telekanal. 

Aytilishicha, bu yerda minglab amerikalik harbiy xizmatchilar va ularning oila a’zolari bo‘ladi. Ruminiya davlati loyihaga 2,5 milliard dollar sarmoya kiritadi.

“Mixail Kogelnichanu” bazasini kengaytirish natijasida paydo bo‘ladigan ulkan harbiy majmua 2,8 ming gektar maydonga ega bo‘lib, yangi ob’ektlarni o‘z ichiga oladi. Loyiha aerodrom infratuzilmasini, jumladan uchish-qo‘nish yo‘laklarini, yangi boshqaruv minorasini, mayoq va radionavigatsiya tizimi, parvoz simulyatori va angarlarni kengaytirishni o‘z ichiga oladi. Bundan tashqari, ma’muriy-ijtimoiy binolar, maktab va bolalar bog‘chalari, savdo do‘konlari, restoranlar, kinoteatr va shifoxona quriladi. Shaharda 10 ming NATO askari oilalari va bazani qo‘llab-quvvatlash xodimlari bilan yashaydi.

“Majmuaning kirish yo‘llari va elektr tarmog‘i qurilayotgan janubiy qismida ishlar allaqachon boshlangan”, deb xabar berdi televideniye. 

Baza 2040 yilda to‘liq ishga tushadi. Ba’zi ma’lumotlarga ko‘ra, natijada “Mixail Kogelnichanu” majmuasi NATOning Yevropadagi eng yirik harbiy bazasiga aylanadi.

“Mixail Kogelnichanu” Ruminiya harbiy-havo kuchlarining 57-bazasini kengaytirish to‘g‘risidagi qaror Ruminiya chegaralari yaqinida so‘nggi ikki yildan beri davom etayotgan qurolli mojarolar fonida qabul qilindi”, deya ta’kidlaydi telekanal. 

AQSH harbiylari “Mixail Kogelnichanu” bazasidan 1999 yildan beri foydalanmoqda va hozirda u yerda AQSHning 101-havo-desant diviziyasining qismlari hamda Ruminiya havo kuchlariga havo politsiyasi missiyalarida yordam beradigan ittifoqchi qiruvchi samolyotlar joylashgan.