Rossiya O‘zbekistonga gaz yetkazib berishni ko‘paytiradi

Bir qancha yangi infratuzilma loyihalari Rossiyadan O‘zbekistonga gaz yetkazib berishni ikki barobarga oshiradi. Bu haqda Rossiya Tashqi ishlar vaziri Sergey Lavrov bugun, 23 aprel kuni O‘zbekistonga tashrifi va respublika rahbariyati bilan muzokaralar yakunlari bo‘yicha o‘tkazilgan matbuot anjumanida ma’lum qildi.

“Gaz sohasida ham hamkorlik rivojlanmoqda, qator infratuzilma loyihalari amalga oshirilmoqda, bu esa Rossiya Federatsiyasidan O‘zbekistonga gaz yetkazib berishni ikki barobarga oshirish imkonini beradi”, deb ta’kidladi u.

Lavrov, shuningdek, Rossiya sarmoyalari O‘zbekiston iqtisodiyotidagi eng yirik sarmoyalardan biri ekanini ta’kidladi.

“Tovar ayirboshlash bo‘yicha biz O‘zbekistonning tashqi savdo hamkorlari bilan aloqalari bo‘yicha umumiy ko‘rsatkichlarining qariyb 18 foizini egallab turibmiz va bu chegaradan uzoqdir”, dedi Rossiya TIV rahbari.

Vazirning aytishicha, ayni paytda respublikada Rossiya kapitali ishtirokida umumiy qiymati 3 trillion 200 milliard rubldan ortiq bo‘lgan 115 ga yaqin investitsiya loyihasi amalga oshirilmoqda.

“O‘zbekiston Prezidenti va Tashqi ishlar vaziri bilan muzokaralar chog‘ida bu jarayonlar qanday rivojlanayotgani, tashqi vaziyatdan qat’i nazar, belgilangan vazifalarni muvaffaqiyatli amalga oshirish uchun iqtisodiy, moliya va bank sohalarida qanday qo‘shimcha qadamlar zarurligini atroflicha ko‘rib chiqdik”, deya qo‘shimcha qildi Lavrov.

Rossiya TIV rahbari, shuningdek, bir yil avval Moskva va Toshkent o‘rtasida O‘zbekistonda birinchi atom elektr stansiyasini qurish bo‘yicha flagman qo‘shma loyiha bo‘yicha kelishuv imzolangani, uni amalga oshirish “amaliy davom etayotganini” eslatdi.

Qozog‘iston Energetika vaziri Yerlan Akkenjenov esa bugun, 23 aprel kuni Qozog‘iston Bosh vaziri Oljas Bektenov raisligida bo‘lib o‘tgan hukumat yig‘ilishida O‘zbekistonga Qozog‘iston orqali yetkaziladigan Rossiya gazining yillik hajmini 2038 yilgacha 11 milliard kub metrgacha oshirish rejalashtirilayotganini ma’lum qildi. 

Uning aytishicha, 2024 yilda Qozog‘iston Rossiya gazining O‘zbekistonga tranzitini 3 barobarga oshirgan, 2025 yilda esa 30 foizga oshishi kutilmoqda.

Yerlan Akkenjenov keltirgan ma’lumotlarga ko‘ra:

• 2023 yilda Qozog‘iston orqali O‘zbekistonga 1,28 milliard m³ rus gazi tashilgan bo‘lsa, 2024 yilda 5,6 milliard m³ [3 barobarga oshgan, ammo 2023 yilda yetkazib berish oktyabr oyida boshlangan, ya’ni bazaviy ko‘rsatkich bor-yo‘g‘i 3 oyni o‘z ichiga oladi, 2024 yil uchun reja 3,8 milliard m³ni tashkil etdi].
• 2025 yilda tranzitni 7,3 milliard m³ga oshirish rejalashtirilgan. 2038 yilga borib, bu ko‘rsatkich yiliga 11 milliard m3 gacha ko‘tariladi.

Eslatib o‘tamiz, 2023 yilning 7 oktyabr kuni Rossiya gazini Qozog‘iston orqali O‘zbekistonga yetkazib berish boshlandi.

2023 yil noyabr oyida “Gazprom” va Qozog‘iston hukumati o‘rtasida strategik hamkorlik to‘g‘risidagi bitim imzolandi.

2024 yil iyun oyida “Gazprom” va “QazaqGaz” 2025-2040 yillarda Rossiya gazini Qozog‘iston hududi orqali O‘zbekiston va Qirg‘iziston yo‘nalishida tashish bo‘yicha xizmatlar ko‘rsatish bo‘yicha kelishuvlarni imzolagan.