Rossiya qo‘shinlari Chernigovga ballistik raketa bilan zarba berdi (video)

Rossiya qo‘shinlari Ukraina shimolidagi Chernigov shahri markaziga hujum qildi. Bu haqda Chernigov viloyati rahbari Vyacheslav Chaus ma’lum qildi.
Dastlabki ma’lumotlarga ko‘ra, shaharga ballistik raketa uchirilgan. Zarbalar oqibatida qurbonlar va yaralanganlar bor.

Chernigov meri vazifasini bajaruvchi Aleksandr Lomakoning aytishicha, raketa hujumidan olti kishi halok bo‘lgan, 11 kishi yaralangan, ba’zilarining ahvoli og‘ir.

Mahalliy matbuotga ko‘ra, zarba dron ishlab chiqaruvchilar ko‘rgazmasi bo‘lgan drama teatri binosiga tushgan.

Ukraina Prezidenti Vladimir Zelenskiy ham Chernigovga berilgan zarba tasvirlangan videolavhani e’lon qilgan. 

“Terrorchi davlat bilan qo‘shnichilik mana shu. Biz butun dunyoni bunga qarshi birlashtirmoqdamiz. Rossiya raketasi shaharning to‘g‘ridan-to‘g‘ri markaziga tushdi. O‘lganlar bor, yaradorlar bor”, deb yozgan Prezident.

Eslatib o‘tamiz, joriy yilning2 avgustga o‘tar kechasi Kiyevga, 8 avgustda Pokrovskka, 9 avgustda Zaporoje shahriga havo hujumi uyushtirilgandi. 11 avgust kuni Rossiya Ukrainaga “Kinjal” raketalari bilan, 12 avgustda esa Krivoy Rog shahriga ballistik raketa bilan hujum qildi.