Россия қўшинлари Черниговга баллистик ракета билан зарба берди (видео)

Россия қўшинлари Украина шимолидаги Чернигов шаҳри марказига ҳужум қилди. Бу ҳақда Чернигов вилояти раҳбари Вячеслав Чаус маълум қилди.
Дастлабки маълумотларга кўра, шаҳарга баллистик ракета учирилган. Зарбалар оқибатида қурбонлар ва яраланганлар бор.

Чернигов мэри вазифасини бажарувчи Александр Ломаконинг айтишича, ракета ҳужумидан олти киши ҳалок бўлган, 11 киши яраланган, баъзиларининг аҳволи оғир.

Маҳаллий матбуотга кўра, зарба дрон ишлаб чиқарувчилар кўргазмаси бўлган драма театри биносига тушган.

Украина Президенти Владимир Зеленский ҳам Черниговга берилган зарба тасвирланган видеолавҳани эълон қилган. 

“Террорчи давлат билан қўшничилик мана шу. Биз бутун дунёни бунга қарши бирлаштирмоқдамиз. Россия ракетаси шаҳарнинг тўғридан-тўғри марказига тушди. Ўлганлар бор, ярадорлар бор”, деб ёзган Президент.

Эслатиб ўтамиз, жорий йилнинг2 августга ўтар кечаси Киевга, 8 августда Покровскка, 9 августда Запорожье шаҳрига ҳаво ҳужуми уюштирилганди. 11 август куни Россия Украинага “Кинжал” ракеталари билан, 12 августда эса Кривой Рог шаҳрига баллистик ракета билан ҳужум қилди.