Rossiya diplomati Eron TIVga chaqirtirildi

Eron Tashqi ishlar vazirligi 20 dekabr kuni Marokashda bo‘lib o‘tgan Rossiya-Arab hamkorlik forumining VI sessiyasi ishtirokchilari tomonidan qabul qilingan yakuniy bayonot munosabati bilan Rossiyaning Tehrondagi vaqtinchalik ishlar vakilini chaqirtirdi. Bu haqda Eron Tashqi ishlar vazirligi xabar berdi.

Rossiya elchisi mamlakatda yo‘qligi sababli Rossiyaning Tehrondagi vaqtinchalik ishlar vakili Eron Tashqi ishlar vazirligiga chaqirilgan. Eron TIVning bildirishicha, muvaqqat ishlar vakiliga forumning Eron va Birlashgan Arab Amirliklari o‘rtasida hududiy bahs mavzusi bo‘lgan Fors ko‘rfazidagi uchta orolga egalik qilish haqidagi bayonoti munosabati bilan norozilik notasi topshirilgan.

Ma’lumotlarga ko‘ra, Rossiya-Arab hamkorlik forumining sessiyasida ishtirok etgan Rossiya va arab mamlakatlari Tashqi ishlar vazirlari barcha tinch yo‘ldagi sa’y-harakatlarni, jumladan, Katta Tunb, Kichik Tunb va Abu Muso orollari masalasini xalqaro huquq tamoyillari va BMT Nizomiga muvofiq tinch yo‘l bilan hal etishga qaratilgan tashabbus va sa’y-harakatlarni qo‘llab-quvvatlashini ta’kidlagan.

Eron Tashqi ishlar vazirligi xabarida ta’kidlanishicha, Fors ko‘rfazi davlatlari departamenti bosh direktori yordamchisi rossiyalik diplomatga “davlatlararo munosabatlar tizimidagi asosiy tamoyillar bo‘lgan suverenitet va hududiy yaxlitlikni hurmat qilish zarurligini” eslatgan.

"Tashqi ishlar vazirligi vakili Eronning Fors ko‘rfazidagi uchta orol ustidan doimiy suverenitetini tasdiqladi va Eron hukumati bu boradagi istalgan tomonning har qanday da’vosini qabul qilib bo‘lmaydigan deb hisoblashini ta’kidladi", deyiladi xabarda.

Eslatib o‘tamiz, joriy yilning 21 dekabr kuni rossiyalik siyosatchi Zaxar Prilepinning O‘zbekistonni bosib olish haqidagi tajovuzkor gaplari ortidan Rossiyaning O‘zbekistondagi Favqulodda va muxtor elchisi Oleg Malginov O‘zbekiston Tashqi ishlar vazirligiga taklif qilingandi.