Ronaldu nimadan norozi bo‘ldi?

“Al-Nasr” va “Al-Hilol” o‘rtasidagi Arab chempionlari kubogi finalining eng yaxshi futbolchisi mukofoti Krishtianu Ronalduga berilmadi. Bu holat esa translyatsiya rejissyorlarining e’tiborini tortdi. 

Final o‘yinida “Al-Nasr” bir kishi kam bo‘lib, “Al-Hilol”ga 0:1 hisobida imkoniyatni boy berayotganida, portugaliyalik futbolchi avvaliga hisobni tenglashtirgan bo‘lsa, qo‘shimcha vaqtda ham gol urib jamoasiga g‘alaba va kubok olib keldi.

Ronaldu turnirda 6 ta gol urib, turnirning eng yaxshi to‘purari bo‘ldi va “Oltin butsa” bilan taqdirlandi, ammo finalning eng yaxshi futbolchisi uchun sovrin kutilmaganda serbiyalik “Al-Hilol” yarim himoyachisi Sergey Milinkovich-Savichga nasib etdi.

Milinkovich-Savichning nomi e’lon qilinganda operatorlar kameralarni Ronalduga qaratdi. Kadrlarda Ronaldu finalda 2 ta gol urganiga ishora qilib, g‘azablanayotgani va hayratga tushganini ko‘rish mumkin.

Arab chempionlari kubogi Ronaldu uchun Saudiya Arabistoniga ko‘chib o‘tganidan so‘ng birinchi kubok bo‘ldi. Umumiy hisobda futbolchi oxirgi ikki yil ichida birinchi sovrinini qo‘lga kiritdi. Oldinda “Al-Nasr”ni yangi mavsum kutmoqda, unda Ronaldu bilan jamoasi yana “Al-Hilol”, shuningdek, “Al-Ahli” va amaldagi chempion “Al-Ittihod” bilan raqobatlashishi kerak.