Роналду нимадан норози бўлди?

“Ал-Наср” ва “Ал-Ҳилол” ўртасидаги Араб чемпионлари кубоги финалининг энг яхши футболчиси мукофоти Криштиану Роналдуга берилмади. Бу ҳолат эса трансляция режиссёрларининг эътиборини тортди. 

Финал ўйинида “Ал-Наср” бир киши кам бўлиб, “Ал-Ҳилол”га 0:1 ҳисобида имкониятни бой бераётганида, португалиялик футболчи аввалига ҳисобни тенглаштирган бўлса, қўшимча вақтда ҳам гол уриб жамоасига ғалаба ва кубок олиб келди.

Роналду турнирда 6 та гол уриб, турнирнинг энг яхши тўпурари бўлди ва “Олтин бутса” билан тақдирланди, аммо финалнинг энг яхши футболчиси учун соврин кутилмаганда сербиялик “Ал-Ҳилол” ярим ҳимоячиси Сергей Милинкович-Савичга насиб этди.

Милинкович-Савичнинг номи эълон қилинганда операторлар камераларни Роналдуга қаратди. Кадрларда Роналду финалда 2 та гол урганига ишора қилиб, ғазабланаётгани ва ҳайратга тушганини кўриш мумкин.

Араб чемпионлари кубоги Роналду учун Саудия Арабистонига кўчиб ўтганидан сўнг биринчи кубок бўлди. Умумий ҳисобда футболчи охирги икки йил ичида биринчи совринини қўлга киритди. Олдинда “Ал-Наср”ни янги мавсум кутмоқда, унда Роналду билан жамоаси яна “Ал-Ҳилол”, шунингдек, “Ал-Аҳли” ва амалдаги чемпион “Ал-Иттиҳод” билан рақобатлашиши керак.