Постекоглу Роналдунинг устозига айланди

Австралиялик мутахассис Анжелос Постекоглу Саудия Арабистонининг “Ал-Наср” клуби бош мураббийи этиб тайинланди. Бу ҳақда клуб матбуот хизмати хабар берди.

Томонлар ўртасида икки мавсумлик шартнома имзоланди. Постекоглунинг сўнгги иш жойи Англиянинг “Ноттингем Форест” клуби бўлиб, у жамоани ўтган йилнинг октябрь ойида тарк этган эди. Аввалроқ португалиялик мутахассис Жорже Жезуш Саудия Арабистони чемпионлигини қўлга киритганидан сўнг “Ал-Наср” бош мураббийлигидан кетишини эълон қилганди.

60 ёшли Постекоглу мураббийлик фаолияти давомида Австралиянинг “Саут Мельбурн”, “Брисбен Роар” ва “Мельбурн Виктори”, Япониянинг “Йокогама”, Шотландиянинг “Селтик” клублари ҳамда Австралия миллий терма жамоасини бошқарган.

У “Саут Мельбурн” ва “Брисбен Роар” билан икки мартадан Австралия чемпиони бўлган. Шунингдек, “Йокогама” билан Япония чемпионлигини, “Селтик” билан эса икки марта Шотландия чемпионлиги, Шотландия кубоги ва Лига кубогини қўлга киритган. Постекоглу 2015 йилда Австралия миллий терма жамоасини Осиё кубоги ғолиблигига ҳам олиб чиққан.

Австралиялик мутахассис 2023–2025 йиллар оралиғида Англиянинг “Тоттенхэм” клубини бошқарди. Унинг раҳбарлиги остида лондонликлар 2024-2025 йилги мавсумда UEFA Европа лигасида ғолиб чиқиб, 2008 йилдан буён илк расмий совринини қўлга киритди. Бироқ жамоа Англия Премьер-лигасини 17-ўринда якунлади.