Rianna 8 mln dollarga to‘yga chiqdi

“Diamonds” treki bilan dunyoga tanilgan amerikalik qo‘shiqchi Rianna Hindistonning eng boy odamlaridan biri Mukesh Ambanining kenja o‘g‘li Anantning to‘yi oldidan o‘tkazilgan dabdabali ziyofatda chiqish qildi. Bu haqda “Hindustan Times” nashri xabar berdi.

Rianna o‘zining amerikalik reper sherigi ASAP Rocky bilan Hindistonning Jamnagar shahriga 28 yoshli Anant va uning bo‘lajak turmush o‘rtog‘i Radhika Merchantning to‘yi oldidan o‘tkazilgan uch kunlik tadbirning ochilishida kuylash uchun borgan.

“India Today”ning yozishicha, Rianna hashamatli kechada "Diamonds", "We found love" va "All of the lights" kabi mashhur treklarini kuylagan.

Xabarlarga ko‘ra, xonanda o‘z chiqishi uchun 8-9 million dollar yoki 66-74 million rupiy miqdorida haq oladi. Ma’lumotlarga ko‘ra, bu to‘lovdan tashqari, Ambani Riannaga minnatdorlik belgisi sifatida olmos bilan bezatilgan soyabon sovg‘a qilgan.

Turli mish-mishlar kuchayib borar ekan, dunyo har ikki tomondan har qanday rasmiy tasdiq yoki bayonotni intiqlik bilan kutmoqda. Ungacha esa olmos bilan bezatilgan soyabon hayratlanarli mish-mishligicha bo‘lib qolmoqda. 

Shuningdek, ziyofatda Mark Sukerberg, Hillari Klinton, Ivanka Tramp, Bill Geyts, Muhammad bin Abdulrahmon bin Jassim Ol Soniy kabi VIP mehmonlar ham qatnashgan.

Mahalliy nashrlar Anant Ambani va Radhika Merchantning nikohini yil to‘yi, deb atamoqda. U hali yana 3 oy davom etadi – asosiy bayram iyun oyida bo‘lib o‘tadi.

Rayhona Ulkanbayeva