“Real” Kepani sotib olmasligining sabablari ma’lum bo‘ldi

Ispaniyaning “Real Madrid” klubi ijara muddati tugagach, Angliyaning “Chelsi” klubidan ispaniyalik darvozabon Kepa Arrizabalagani sotib ololmaydi. Bu haqda “Real Madrid Exclusivo” xabar berdi.

Manbaga ko‘ra, Madrid klubining bu qaroriga ikkita omil ta’sir qilmoqda. Klub Kepaga kuchli ishonch bildirmayapti. Undan tashqari klub posbon yuqori maosh so‘rashidan xavotirda.

Qayd etilishicha, Arrizabalaga “Chelsi”da yiliga 8 million yevro oladi va “Real” ikkinchi raqamli darvozaboniga buncha summa to‘lamoqchi emas. Shuning uchun katta ehtimol bilan Karlo Anchelotti jamoasida kelasi mavsumda darvozabonlar juftligi Tibo Kurtua va Andrey Lunin bo‘ladi.

Qayd etish joiz, Kepa “qirollik klubi”ning “Atletiko” bilan Ispaniya superkubogi doirasidagi so‘nggi o‘yindagi xatti-harakatlari uchun tanqid qilindi. Biroq ushbu uchrashuvdan so‘ng “Real” bosh murabbiyi Karlo Anchelotti o‘tkazib yuborilgan gollarda Kepaning aybi yo‘qligini aytdi.