“Real” afsonasi Yevro-2024'da qatnashmasligiga munosabat bildirdi

Kecha, 27 may kuni Ispaniya terma jamoasi bosh murabbiyi Luis de la Fuente  Yevro-2024'ga tayyorgarlik ko‘radigan 29 nafar futbolchidan iborat kengaytirilgan ro‘yxatni e’lon qildi. “Real Madrid”ning tajribali qanot futbolchisi Lukas Vaskes qaydnomaga kiritilmadi.

Tarkib e’lon qilingandan so‘ng, Vaskes ijtimoiy tarmoqdagi sahifasida ikkita kulib turgan reaksiyani bildirdi,  biroq, keyinchalik xabarni o‘chirib tashladi.

Vaskes so‘nggi mavsumlarda o‘ng qanot himoyachisi sifatida o‘ynamoqda. De la Fuente bu pozitsiya uchun Dani Karvaxal va Xesus Navasni afzal ko‘rdi.

Joriy mavsumda Vaskes barcha turnirlar doirasida 37 ta o‘yinda maydonga tushib, 3 ta gol va 8 ta golli uzatmaga mualliflik qilgan.

Yevro-2024'ning guruh bosqichida Ispaniya terma jamoasi Italiya, Xorvatiya va Albaniyaga qarshi bahs olib boradi. Qizil furiya turnirdagi ilk uchrashuvini 15 iyun kuni Xorvatiyaga qarshi o‘tkazadi.