Ravshan Ermatov Ahmadjonovning o‘rnini egallaydi

Xabaringiz bor, biroz oldin 2017 yildan beri O‘FAni boshqarib kelayotgan Umid Ahmadjonov rasman iste’fo bergan edi.

QALAMPIR.UZ manbasiga ma’lum bo‘lishicha, ayni paytda O‘FA vitse-prezidentligiga birinchi nomzod sifatida FIFA hakami Ravshan Ermatov ko‘rilmoqda.

Ravshan Ermatov 1977 yilning 9-avgustida Toshkent shahrida dunyoga kelgan. Futbolchi bo‘lish orzusida bo‘lgan Ermatov 18 yoshigacha "Paxtakor" futbol maktabida shug‘ullangan. Ammo oyog‘idan olgan og‘ir jarohati tufayli futboldan ketishga majbur bo‘ladi. 

Shundan so‘ng u otasi Sayfiddin Ermatov yordamida hakamlikni sir-sinoatlarini o‘rganishga tushdi. Uning ilk muvofaqqiyati JAR yashil maydonlarida o‘tkazilgan Jahon chempionatiga to‘g‘ri kelgan edi. O‘sha mundialda Ermatov debyutant sifatida 5 ta o‘yinni boshqarib borgan edi. Bu hakamlikdagi uning ilk rekordi hisoblanadi.

Shundan so‘ng Braziliya va Rossiyada bo‘lib o‘tgan Jahon chempionatlarida ham 6 ta o‘yinni boshqarib bordi va umuiy hisobda 11 ta o‘yin bilan yakka rekordchi bo‘lib turibdi. Ermatov bu yutuqlardan tashqari 5 karra Osiyoning eng yaxshi hakami hisoblanadi.